Kryetari i Bashkimit Demokratik për Integrim, Ali Ahmeti, në 18 vjetorin e partisë ka përcaktuar synimin e radhës, që Maqedonia e Veriut të ketë kryeministrin e parë shqiptar.
“Bashkë i përcaktuam dhe i realizuam synimet tona dhe në këtë përvjetor kaq të rëndësishëm për të gjithë ne, le ta përcaktojmë bashkërisht edhe qëllimin tonë të radhës që në zgjedhjet që pasojnë, të realizojmë synimin për të zgjedhur një personalitet të vlerësuar, të dëshmuar dhe të pranueshëm të cilin ose të cilën do ta përzgjedhim bashkërisht për KRYEMINISTRIN E PARË SHQIPTAR!!!” Shkroi në rrijetin social fejsbuk Ali Ahmeti, kryetar BDI.
Partneri aktual i Ahmetit, kreu i LSDM-së Zoran Zaev thotë se nëse BDI e ka këtë si kusht për formimin e qeverisë së ardhshme, atëherë BDI nuk do të jetë fare pjesë e kabinetit, nëse Zaev është mandatar.
“Nëse LSDM fiton në zgjedhje, unë jam kandidati për Kryetar të Qeverisë dhe do të jem kryeministër që në mënyrë të barabartë do të luftoj për jetë më të mirë për të gjithë qytetarët e Maqedonisë së Veriut, gjë që e kam dëshmuar në të gjitha politikat e mia gjatë viteve. Në përputhje me këtë, nëse BDI ka kusht të këtillë për koalicion për Qeverinë, atëherë BDI nuk do të jetë pjesë e qeverisë së ardhshme”, tha Zoran Zaev, kryetar LSDM.
E opozitarja VMRO-DPMNE sot ka vendosur për Hristijan Micskoskin si kandidat për mandatar për qeverinë e re.
“Njëzëri u soll vendim që kandidat për mandatar të jetë Prof. Dr. Hristijan Mickoski. Kështu që në këto zgjedhje krahas VMRO-DPMNE-së, kandidatët e tyre do të kenë edhe LSDM dhe BDI. Ndërsa vendimin final do ta sjellin qytetarët në zgjedhje”, u tha nga VMRO-DPMNE.
Ndaj kërkesës së BDI-së për kryeministër shqiptar s’kanë munguar reagimet e opozitës shqiptare. Kryetari i Lëvizjes Besa, Bilall Kasami, partner parazgjedhor i LSDM-së, e ka quajtur ide populiste dhe vetëm për përfitime të pak poenëve politik. Madje shkruan se shqiptarët në të ardhmen edhe mund të kenë kryeministër në Maqedoninë e Veriut, por ai me siguri nuk do të jetë nga radhët e BDI-së derisa kjo parti nuk po e lufton krimin dhe korrupsionin brenda saj.
Nga Aleanca për Shqiptarët reagojnë duke thënë se sikur BDI të kishte përmbushur obligimin e tyre ndaj qytetarëve për të gjitha premtimet e dhëna dhe sikur të ishte i sinqertë në idenë për qeverisje shqiptare dhe jo konsensuale, do ta kishe përkrahur kandidatin për president shqiptar në zgjedhjet presidenciale, por, ata vendosën për president konsensual sepse kjo përkrahje ishte vetëm një lojë politike e BDI-së në shkëmbim të interesave partiake me qëllim që të fitojë disa komuna më shumë në zgjedhjet lokale të cilat e dinte se i kishte të humbura.