Banorët e Konjares edhe sot lanë punët e tyre për të dalë në protestë dhe për t’i ndal punimet firmës e cila po gërryen tokën afër shtëpive të tyre.
Banorët me vete kishin marr edhe ushqim për të qëndruar më gjatë.
Këtë herë protestuesit nuk ishin vetëm, ata po i përcillte policia.
Një banorë i Konjares tha se ka muaj që po lë punët e tij private për të protestuar dhe për të ndal makineritë e rënda që po gërryejnë dhe po dëmtojnë fshatin e Konjares.
“Unë kamë mbi tre muaj që e kam lanë punën për këtë problem.
Çdo dit zgjohem për të shkuar në punë, vijnë makineritë e rënda, edhe duhet me lanë punën për me bllokuar punën edhe kemi me vazhdua deri në fund. Të ishte kanë për me u ndryshua ndonjë ligj i rëndësishme nuk kishte zgjatë kaq shumë sa kjo procedura jonë”, tha një banor i Konjares.
“Na jemi në zor, jemi mbështetur për muri nuk kemi ku shkojmë prej shtëpive tona nuk mundemi me dal. Veç me i lëshuar edhe shtëpitë. Le të bije shteti vendim për me i lëshuar shtëpitë le të vijnë le të paguajnë edhe le të na qojnë në Shkup.
Populli nuk kanë ujë për pijë, e kanë ndalur dhe e kanë prish të gjithë ujin”, shtoi një tjetër banor i Konjares.
Ministri i Ekonomisë Kreshnik Bekteshi mbrëmë në emisionin Click Plus tha se po pret raportin e Inspektorit të Ambientit Jetësorë dhe të Bujqësisë, për të parë nëse ka shkelje dhe parregullsi dhe nëse konstatohet një gjë e tillë, tha se kontrata do të shfuqizohet menjëherë.
“Kjo çështje nuk ka të bëjë me Ministrinë e Ekonomisë për marrjen e koncesionit ne presim raportin nga inspektorati i Ambientit Jetësorë dhe inspektorati i Bujqësisë nëse raporti konstaton shkelje nga ana e koncesionerit unë menjëherë atë ditë po sa ta marr atë raport do ti propozoj Qeverisë shfuqizimin e kontratës në Konjare”, deklaroi ministri i Ekonomisë, Kreshnik Bekteshi.
Në Konjare të mesme po gropohet që prej vitit 2008, e që atëherë banorët po protestojnë që të ndalet nxjerrja e rërës nga lumi dhe dëmtimi i natyrës. Kjo gjendje, siç thonë ata, ka dëmtuar rëndë edhe bujqit dhe blegtorët.
Ndërsa para disa dite dhjetëra banorë që protestuan u thirrën në stacionin policor për shkak se bllokuan autostradën pa paralajmërim.