Autostrada Shkup-Bllacë nuk mund të ndërpritet, Asllani: Presim kompromis mes pronarëve dhe institucioneve për çmimin

18 pronarë të tokave ku duhet të ndërtohen dy kilometrat e parë të autostradës Shkup – Bllacë kanë angazhuar avokatin Mefail Asllani. Ata kërkojnë të rivlerësohet toka e tyre dhe me këtë të rritet çmimi të cilin ia kanë caktuar autoritetet shtetërore për shpronësimin.

Avokati Asllani thotë se procedura është në fazën e arritjes së marrëveshjes mes pronarëve, Ndërmarrjes Publike “Rrugë shtetërore”, Ministrisë së Financave dhe Avokatit Shtetëror, me qëllim që të gjendet një çmim kompromisi. Beson se rasti nuk do të shkojë në Gjykatën Themelore Shkupi 1, pasi siç thotë ajo është procedurë që zgjatë me vite.

“Realisht, unë jam optimist që do të gjejmë një marrëveshje, ku ne do ta vërtetojmë gjendjen faktike të pronave, konkretisht çmimit real të pronave i cili është. Besoj që edhe vetë Ndërmarrja, Ministria e Finave apo edhe Avokati Shtetëror do të kemi pajtueshmëri dhe do të arrijmë në një çmim i cili do të jetë i kapshëm për të dy palët”, sqaron avokati Mefail Asllani.

Siguron se angazhimi i tij si avokat dhe kërkesa e banorëve për çmim më të lartë, nuk mund të ndërpresë ndërtimin e autostradës, pasi siç thotë, ai është projekt nacional dhe Ligji për shpronësim është i qartë në këtë pjesë.

“Vetë Ligji e parasheh, që kur bëhet fjalë për interes publik, që ai projekt, konkretisht rruga nuk mund të pengohet. Mirëpo, Ligji është i saktë dhe thotë, se secili pronar të drejtat e veta duhet t’i kërkojë në bazë të procedurave që i parasheh ligji për shpronësim”, deklaroi Asllani.

Asllani është i bindur se kërkesa e pronarëve të tokave në Bllacë është e drejtë e tyre dhe se pret që Ministria e Financës dhe Ndërmarrja Publike “Rrugët Shtetërore” të gjejnë një çmim kompromisi.

Ndërkohë banorët në disa raste janë ankuar se u është ofruar çmim i ulët, që varion nga 4 deri në 10 euro. Përveç me shpronësimin, projekti po ngec edhe në terren, sepse ka 5 muaj që kanë filluar punimet, ndërkaq asnjë centimetër nuk është shtruar. Ende po punohet në gërryerjen e trasesë.  Dje pyetëm në “Rrugë shtetërore” se pse punimet po ecin ngadalë, por nga atje ende pa përgjigje.