ASH-ja për rastin me Llatasin: Gratë dhe vajzat tona janë në rrezik, të ndërmarrin masa Prokuroria dhe MPB-ja!

Ndaj rastit ku Dragan Pavlloviç Latas tregon se si kanë përdhunuar një 15-vjeçare, ka reaguar edhe partia, Aleanca për Shqiptarët.

Nga kjo parti, thonë se deklarata publike ku flitet për këtë rast, është dhunim i dyfishtë për viktimën.

Ftojnë institucionet përgjegjëse që të ndërmarrin masa, transmeton TV21.

“Ftojmë Prokurorinë dhe Ministrinë e Punëve të Brendshme që ky rast të mos zvarritet dhe të përfundojë si shumë raste të tjera që vjetërsohen në sirtare, por përfundimisht, shembujt e tillë të marrin dënimin e merituar për të shërbyer si mësim për të tjerët. Fëmijët, gratë dhe vajzat në shoqërinë tonë janë nën rrezik permanent, aq më tepër kur publikisht cënohen dhe devalvohen nga persona me ndikim publik, ndërkohë institucionet heshtin para rasteve të këtilla”, thanë nga Asambleja e Gruas së ASH-së.