Arrihet marrëveshja për ligjin për shtetësinë! Zaev dhe Sela pa detaje se për çfarë janë marrë vesh

Pushteti dhe opozita shqiptare për të tretën herë u takuan për tu marrë vesh për ligjin për shtetësi dhe për të tretën herë potencuan se janë marrë vesh. Sela dhe Zaev thanë se kanë arritur marrëveshje verbale dhe presin që e njëjta të hidhet në letër.

“Besoj se kemi arritur marrëveshje. Ajo që sot u morëm vesh do ta vendosim në letër meqë ka edhe formulime juridike, ndërsa më pas do t’i bëjmë publike të gjitha detajet edhe për opinionin”, tha kryeministri Zaev.

“Jemi në rrugë të mbarë, tek një pjesë e madhe e gjërave që i kemi hapur si tema kemi arritur marrëveshje, por kuptohet që tani do të duhet edhe njëherë t’i rishqyrtojmë të gjitha pikat e ligjit”, deklaroi Ziadin Sela – Kryetar i Aleancës për Shqiptarët.

Teksti final i ligjit për 1 javë do të jetë gati, ndërsa Sela dhe Gashi insistuan që të mos japin detaje mbi marrëveshjen.

“Mbetem në atë që e thash, me publikimin do të tregojmë publikisht se çka është pranuar. Edhe ne pranuam diçka edhe ata pranuan , prandaj është arritur edhe marrëveshje”, potencoi Zoran Zaev – Kryeministër i Maqedonisë së Veriut.

“Unë do të ju lutem që të mos kërkoni detaje rreth çështjeve që janë dakordësuar sepse interesi ynë është që tua zgjedhim problemin qytetarëve që kanë nevojë”, shtoi Ziadin Sela – Kryetar i ASH-së.

Sela thotë se nëpërmjet ligjit synojnë që të paktën qytetarët që kanë lindur në Maqedoni të marrin shtetësinë. Pas shqyrtimit të ligji final, nëse të dyja palët e pranojnë atëherë i njëjti niset për në procedurë parlamentare.