Armata shënon 30-vjetorin / “Do të ketë përfshirje më të madhe të bashkësive etnike të pakicave”

TË FUNDIT

Me një ceremoni solemne, Armata e Maqedonisë festoi ditëlindjen e saj të 30-të. Manifestimi u mbajt në Kazermën “Ilinden” në Shkup, kurse fjalim mbajtën shefi i shtetit, Stevo Pendarovski, ministrja e Mbrojtjes, Sllavjanka Petrovska dhe shefi i Shtabit të Përgjithshëm, gjeneral-nënkoloneli Vasko Gjurçinovski.

Presidenti Pendarovski, foli për fillimet e Ushtrisë dhe avancimin e saj ndër vite. Rikujton se gjatë periudhës së kaluar në transformimin e Armatës kishte dhe do të ketë përfshirje më të madhe të komuniteteve etnike të pakicave në vend.

“Në të, të gjitha dallimet etnike, fetare dhe gjuhësore, janë të bashkuara në lojalitetin ndaj atdheut tonë të përbashkët. Pjesë e rëndësishme e transformimit të Armatës ishte dhe do të jetë përfshirja e pjesëtarëve të komuniteteve etnike të pakicave dhe grave në të gjitha strukturat e armatës në të gjitha nivelet, duke përfshirë edhe njësitë speciale. Kriteret e larta për regrutim dhe përparim janë cilësitë profesionale, përkushtimi ndaj profesionit ushtarak dhe integriteti personal.”- deklaroi Stevo Pendarovski, President I RMV-së.

Në ceremoninë e sotme, me dekorim për merita ushtarake u dekorua ministri i parë i mbrojtjes, Trajan Gocevski. Presidenti Pendarovski e ngriti në detyrë kolonelin Sashko Llavçiski, komandant i deritanishëm i Brigadës së parë të këmbësorisë, në gjeneral të Brigadës. Ministrja e mbrojtjes Sllavjanka Petrovska në fjalimin e saj foli për sukseset e Armatës si partner në misionet ndërkombëtare duke e bërë Maqedoninë e Veriut shtet i respektuar në NATO dhe BE-në.

“Korrelacioni i fortë mes rreziqeve të sigurisë dhe kërcënimeve, gjendja në rajon dhe në kontinentin evropian, duhet të shfrytëzohen mirë. Ministria e mbrojtjes mbetet e përkushtuar në zbatimin e të gjitha masave dhe aktiviteteve të parapara me planin afatgjatë për zhvillim të shkathtësive të mbrojtjes, në  konceptin strategjik të NATO-s  dhe në konceptin MKD Mbrojtje 2030.”- pohoi Sllavjanka Petrovska, Ministre e Mbrojtjes.

Ekzistimi 30 vjeçar i Armatës u shënua me defile solemne të eshalonëve të pjesëtarëve të të gjitha komandave dhe njësive të Armatës. Jubileu festohet në kohë kur vendi është anëtar i NATO-s tashmë dy vjet.

error: Content is protected !!