Apple padit prodhuesin izraelit të softuerave

Kompania Apple ka bërë të ditur se ka paditur prodhuesin izraelit të softuerave ‘NSO Gropu’ për “shkelje flagrante” të ligjit amerikan që burojnë nga përpjekjet për të shënjestruar përdoruesit e celularëve iPhone.

Padia është e fundit kundër kompanisë izraelite ‘NSO Group’ pasi WhatsApp dhe kompania mëmë e Facebook-ut ‘Meta’ ndërmorën veprime në muajin tetor.

Apple tha se po kërkon një urdhër të përhershëm për të parandaluar që ‘NSO Group’ të përdorë më ndonjë nga pajisjet, softuerin ose shërbimet e saj, pasi softueri i spiunimit ‘Pegasus’ i kompanisë izraelite u përdor për të vëzhguar dhe shënjestruar përdoruesit e Apple.

“Aktorët e sponsorizuar nga shteti si ‘NSO Group’ shpenzojnë miliona dollarë në teknologji të sofistikuara të mbikëqyrjes pa përgjegjësi efektive. Kjo duhet të ndryshojë”, tha Craig Federighi, zv/kryetar i kompanisë Apple për çështjet e inxhinierisë së softuerit.

Sipas tij, pajisjet e Apple janë më të sigurta për konsumatorët në treg, por kompanitë private që zhvillojë softuere të spiunimit të sponsorizuar nga shteti janë bërë edhe më të rrezikshme.

“Derisa këto kërcënime të sigurisë kibernetike prekin vetëm një numër shumë të vogël të klientëve tanë, ne e marrim shumë seriozisht çdo sulm ndaj përdoruesve tanë dhe po punojmë vazhdimisht për të forcuar mbrojtjen e sigurisë dhe privatësisë në iOS”, tha Federighi.

Ankesa ligjore e Apple pretendon se ‘NSO Group’ zbatoi një shfrytëzim të riparuar të njohur si ‘FORCEDENTRY’ në softuerin e tij të spiunimit që lejonte përdoruesit të depërtojnë në pajisjet Apple dhe të instalonin softuerin ‘Pegasus’.

Apple tha se do të kontribuonte me 10 milionë dollarë, si dhe me një shumë të papërcaktuar dëmshpërblimi që po kërkon një gjykatë, për organizatat që janë të specializuara në luftimin e këtij softueri të spiunimit.

Drejtori i Laboratorit Civil të Universitetit të Torontos, Ron Deibert, përshëndeti veprimin ligjor të kompanisë Apple, duke theksuar se ky është një hap drejt mbajtjes së kompanisë ‘NSO Group’ përgjegjëse për abuzimet e tyre.

Ai shprehu shpresë se “do të ndihmojë për të sjellë drejtësi për të gjithë ata që kanë qenë viktimë nga sjellja e pamatur” e kompanisë izraelite.

“Kompanitë mercenare si ‘NSO Group’ kanë lehtësuar disa nga abuzimet më të këqija të të drejtave të njeriut në botë, si dhe disa nga aktet e shtypjes transnacionale duke pasuruar veten dhe investitorët e tyre”, tha Deibert.

‘NSO Group’ ka pohuar se ua shet softuerin spiun qeverive vetëm për qëllime të ligjshme, por në mënyrë të përsëritur është zbuluar në qendër të polemikave, përfshirë përpjekjet për të vëzhguar gazetarët, disidentët dhe krerët e shtetit.

SHBA e sanksionoi kompaninë më 3 tetor pasi përcaktoi se ‘NSO Group’ dhe një kompani tjetër izraelite e vëzhgimit ‘Candiru’ zhvilluan dhe furnizuan ‘softuere të spiunimit për qeveritë e huaja që përdorën këtë mjet për të shënjestruar në mënyrë dashakeqe zyrtarë qeveritarë, gazetarë, biznesmenë, aktivistë, akademikë dhe punonjës të ambasadave”.