Apostolova: Respektimi i vendimit të Gjykatës Kushtetuese, parim kryesor për sundimin e ligjit

Shefja e Zyrës së Bashkimit Evropian në Kosovë, Natalia Apostolova, u bëri thirrje të gjithë aktorëve politikë në vend që të respektojnë vendimin e Gjykatës Kushtetuese të Kosovës në lidhje me dekretin e presidentit Hashim Thaçi për dhënien e mandatit për formimin e qeverisë së re për partinë që nuk fitoi në zgjedhje.

Apostolova tha se BE po monitoronte nga afër gjendjen pas vendimit të gjykatës së mbrëmshme, me të cilën u hodh poshtë kërkesa e partisë qeverisëse të Lëvizjes Vetëvendosje (VV) të Albin Kurtit për të shpallur dekretin e Thaçit si antikushtetues.

“Ne i bëjmë thirrje të gjithë aktorëve politikë në Kosovë që të respektojnë vendimin e Gjykatës Kushtetuese dhe të ndërmarrin hapat e nevojshëm për zbatimin e këtij vendimi. Kjo i referohet respektimit të parimit kryesor të sundimit të ligjit”, tha Apostolova për mediat në Prishtinë.

Lideri i LDK-së, Isa Mustafa njoftoi sot se seanca parlamentare për të votuar propozimin e Avdullah Hotit për qeveri të re do të mbahet nesër, të shtunën, ose të hënën, më 1 qershor.

Kryeministri në detyrë dhe lideri i Lëvizjes Vetëvendosje, Kurti, sot deklaroi se nuk e pranon vendimin e Gjykatës dhe paralajmëroi se për veprimet e ardhshme të partisë së tij do të njoftojë qytetarët në ditët në vijim.

Në rrjetet sociale tanimë paralajmërohet protestë e madhe e anëtarsisë dhe ndjekësve të Lëvizjes Vetëvendosje, që do të realizohej në kryeqytetin e Kosovës, të premten e ardhshme, më 5 qershor./MIA