Angellovska e Bekteshi takojnë përfaqësuesit e turizmit dhe hotelerisë për subvencionimin e pagave

Bëhet fjalë për ndryshime të paramenduara mirë në masën për subvencionimin e pagave në ekonomi që do të përfitojnë, si punëtorët, ashtu edhe punëdhënësit, porositi sot ministrja e Financave, Nina Angellovska.

Pas takimit të sotëm me përfaqësuesit e sektorëve më të prekur – turizmit dhe hotelerisë, ministrja Angellovska tha se janë zgjidhur të gjitha dilemat dhe çështjet e hapura që lidhen me këtë masë.

Turizmi, hotelieria dhe transporti janë sektorët që do të jenë në gjendje të kombinojnë këtë masë për të subvencionuar pagat për punonjësit me atë të subvencionimit të 50 për qind të kontributeve.

“Për të gjitha kompanitë nga këta tre sektorë që kanë punuar me fitim, realisht nuk kanë bërë humbje në dy vitet e kaluara, nuk janë debitorë në listën e DAP-së dhe nuk kanë kredi mbi 90 ditë të vonuara, mund t’i kombinojnë këto dy masa”, deklaroi Angellovska.

Ministri i Ekonomisë Kreshnik Bekteshi paralajmëroi se si qeveri ata do të vazhdojnë të jenë fleksibilë dhe të dëgjojnë zërin e biznes sektorit në krijimin e masave, për t’i mundësuar kompanive që të tejkalojnë më lehtë periudhën e krizës.

“I ndjekim të gjitha zhvillimet në sektorin e turizmit, duke pasur parasysh se ai është një nga sektorët më të rëndësishëm për sa i përket fluksit të hyrjes së valutës dhe efektit të drejtpërdrejtë që ai ka në ekonomi. Vitet e kaluara, kemi pasur rezultate të shkëlqyera në këtë sektor dhe jemi të detyruar të punojmë me të gjithë palët e interesuara për të tejkaluar sa më lehtë këtë gjendje krizë”, deklaroi Bekteshi.

Hotelierët shpresojnë të fillojnë së shpejti punën për të mbuluar shpenzimet themelore.

“Fatkeqësisht, nuk mund të parashikojmë se kur do të hapen hotelet, por shpresojmë se do të jetë së shpejti. Ne do të mësohemi me një jetë të re dhe masa të reja që presim të miratohen së shpejti. Shpresojmë që të kemi sezon pak më ndryshe, në të cilin do të jemi në gjendje të notojmë dhe të bëjmë plane të reja për vitin 2021”, deklaroi Kërste Bllazevski nga HOTAM.

Bëlazevski mohoi informacionet se punëtorët e turizmit pushohen nga puna. Siç tha ai, nuk janë pushuar nga puna ata që janë të punësuar të përhershëm, por me siguri bëhet fjalë për punëtorë sezonal./MIA