Aktakuzë për mashtrim ndaj Zhan Mitrevit, reagojnë nga klinika: Shihemi në gjyq

Prokuroria ka ngritur aktakuzë ndaj Zhan Mitrev dhe klinikës së tij “Zhan Mitrev” për mashtrim të pacientëve dhe familjeve të tyre me metodën e hemofiltrim si shërim për të infektuarit me Covid-19. Nga Prokuroria thonë se Zhan Mitrev, në vazhdimësi para pacientëve dhe opinionit publik ua ka reklamuar dhe promovuar metodën e hemofiltrimit si alternativë për shërim nga koronavirusi, mirëpo duke mos u treguar faktet kyçe të kësaj metode e cila mund edhe të dështojë. Në këtë mënyrë Zhan Mitrev ka fituar pasuri prej afro 1.6 milion eurove ose rreth 100 milion denarë.

“Vepra për të cilën akuzohet i pandehuri është fshehja e fakteve kyçe sa i përket metodës së hemofiltrimit. Metodë që është treguar ashtu siç nuk duhet dhe nuk guxohet të tregohet dhe më këtë tek të dëmtuarit është krijuar huti dhe përshtypje e rrejshme për thelbin e metodës si metodë që është efikase në luftën kundër dhe në një mënyrë si alternativë kundrejt mjekimit klasik. Reklamimi nga i akuzuari është bërë shumë shpesh nëpër mediume, portale dhe drejtpërdrejtë me pacientët”,  thonë nga Prokuroria Themelore.

Metoda e hemofiltrimit nuk është dashur të promovohet te pacientët me Covid-19, përderisa që kjo metodë nuk është e aprovuar në trajtimin e kësaj sëmundjeje. Sipas prokurorisë  asnjërit pacient nuk i është ofruar dokument që ka nënshkruar ku pranon pasojat që vijnë si shkak i kësaj metode. Në aktakuzë nuk është përfshirë asnjë mjek tjetër, por edhe asnjë institucion që duhej të parandalonte një gjë të tillë.

“Nga perspektiva e sotme ne mund të flasim për shumë punë, por kur kishte Covid-19, milionë gjëra ishin vështirë për t’u bërë për shkak se luftohej për çdo jetë njeriu. Nuk mundemi gjithmonë të kërkojmë atë pjesë të përgjegjësisë në situatën kur të gjitha institucionet punonin që sadopak të sanohen dëmet nga pandemia”, thojnë nga Prokuroria Themelore

Dënimi i mundshëm për Zhan Mitrevin është 10 vite burg, ndërsa si të mashtruar dyshohet të jenë 283 pacientë dhe secili prej tyre do të duhet të dëmshpërblehet nëse kërkon një gjë të tillë.

“Shihemi në gjyq” është reagimi i Klinikës “Zhan Mitrev” menjëherë pas lajmit se prokuroria ka ngritur aktakuzë për mashtrim ndaj Zhan Mitrevit.

“Kjo farsë e sulmeve të pabaza në gjykatë duhet të dëshmohet sepse e vërteta është se asnjë pacient nuk ka qenë i mashtruar dhe të gjitha trajtimet dhe proceset në spital kanë qenë publike, transparente dhe në interes të qytetarëve. Me këtë do të bie edhe vetë akuza e Prokurorisë”, thonë nga Klinika Zhan Mitrev.

Nga “Zhan Mitrev” përfundojnë se klinika ka punuar sipas standardeve më të larta shëndetësore dhe në përputhje me metoda të lejuara të trajtimit, në vendin tonë dhe në botë. Lënda për Zhan Mitrev është formuar prej hulumtimit që ka bërë IRL në dokumentarin investigativ  të quajtur “Gjak i papastër”.