Aksidenti që i mori jetën 24-vjeçares Nikollova, familjarët protestojnë kundër vendimit 3 vjet burg për shoferin

Për 1 orë bllokuan rrugën para Gjykatës Penale. Protestojnë duke kërkuar drejtësi. Familjarët e të ndjerës Viktoria Nikollova, që humbi jetën në aksidentin afër “City Mall” kërkojnë dënim më të lartë për shoferin që e përplasi për vdekje 24-vjeçaren Nikollova.

Protestuan të qetë, ndërsa në pankarta shkruante “Drejtësi për Viktorian”, “Prano fajin dhe lirohu”, “Shofer vrasës=gjykatës pa ndërgjegje”.

Liljana Nikollova, motra e të ndjerës kërkon dënim real të të akuzuarit Jordan Gjeorgjiev.

“Kërkojmë aktvendim të ri me pritshmëri reale sepse nuk do të ndalemi këtu. Mjaft më me tortura dhe me këtë çmenduri. Dëgjojeni zërin tonë sepse për shkak punë tuaj jo profesionale do të dëgjojë e gjithë bota”, u shpreh Liljana.

Dënimin e Gjykatës Penale, prokuroria e ka ankimuar para Apelit. Avokati Vlladimit Mihajlloviç pret nga Gjykata e Apelit që t’i shqyrtojë dëshmitë dhe shqiptojë dënim të tillë që të jetë mësim për shoferët e tjerë që vozisin pa kujdes.

“Ne kërkojmë drejtësi, dënim real dhe atë që i takon me ligj, pa lecitime paraprake. Fillimi ynë gjatë gjithë procedurës ishte i qetë dhe ashtu do të vazhdojmë sepse duhet të besojmë në drejtësi. Nuk e kishim në pjesën e parë të procedurës, prandaj apelojmë që Apeli t’i shqyrtojë faktet dhe rrethanat dhe ta shohë anën e të dëmtuarve, dhe jo i akuzuari të shndërrohet në viktimë”, tha Mihajlloviç.

Pas protestës, nga Gjykata Penale përmes një komunikate për media, thanë se Kryetari i Këshillit Gjyqësor gjatë përcaktimit të dënimit është udhëhequr nga dispozitat ekzistuese ligjore që rregullojnë këto vepra penale, të gjitha rrethanat lehtësuese të ndërlidhura me humbjen e jetës, frekuenca e veprave penale konkrete si dhe ndikimi represiv dhe parandalues i aktgjykimit.

“Gjykata ka qenë e detyruar të marrë parasysh rrethanat lehtësuese se bëhet fjalë për pranimin e fajit nga i pandehuri, moshën e tij dhe rrethanat në të cilat është kryer vepra penale, gjegjësisht sa është tejkaluar shpejtësia dhe shpejtësia e lejuar dhe fakti që i pandehuri nuk ishte nën ndikimin e alkoolit apo lëndëve narkotike. Për këtë arsye aktgjykimi konkret nuk mund të krahasohet me aktgjykimet e tjera, tashmë të plotfuqishme, ku janë shqiptuar dënime me kusht apo dënime më shumë se shtatë vjet”.

Përndryshe, Gjykata Penale, para disa ditëve dënoi me 3 vite burg 22-vjeçarin Jordan Gjorgjiev i cili para Qendrës Tregtare “City Mall” përplasi për vdekje Viktoria Nikollovën, ndërsa më lëndime trupore mbeti i dashuri i saj Leonid Daov. Gjorgjiev pranoi fajin që në seancën e parë gjyqësore dhe shprehu keqardhje për atë që ka bërë. Pas kryerjes së dënimit, Gjeorgjievit i është ndaluar edhe vozitja për 3 vjet.