Vendimi i marrë nga KSHZ dhe I vërtetuar nga Gjykata Administrative për t’u rivotuar në shtatë vendvotime të ndryshme në zonën 5 dhe 6, nuk u mirëprit nga Fronti Europian. Për këtë shkak, BDI dje mblodhi kryesinë qendrore për të diskutuar se çfarë do të ndërmarrin. Kreu I kësaj partie Ali Ahmeti, tha që kjo po bëhet me qëllim që të fusin shqiptarët në vëllavrasje.
“Kjo përsëritje që bëhet, bëhet me një prapavijë edhe më të rrezikshme për të na futur neve shqiptarëve në vëllavrasje. Siç e bënë në një vendvotim në komunën e Zhelinës”, tha Ali Ahmeti – Kryetar I BDI-së.
Sipas Ahmetit, këto plane po krijohen në podrume të kuqe nga ana e VMRO-së dhe LSDM-së. Thotë se I din të gjitha detajet dhe shumë shpejtë do t’i demaskojnë.
“Të gjitha akrobacionet politike, marrëveshjet e fshehta nëpër podrumet e kuqe që bëhen, janë të papranueshme dhe janë të dënueshme. Sepse përbëjnë hap pas, dhe asnjë hap pas nuk duhet të tolerohet por të gjitha palët duhet të reflektojnë. Ne I dimë të gjitha në detaje marrëveshjet në podrumet e kuqe, marrëveshjet politike. Në të ardhmen do të dalim në detaje për të gjitha marrëveshjet ku do t’I demaskojmë në opinion”, theksoi Ali Ahmeti – Kryetar I BDI-së.
Nga koalicioni VLEN shprehin keqardhje për Ahmetin, duke theksuar se Ahmeti e ka humbur kontrollin pasi e humbi dhe pushtetin. I bëjnë thirrje të veprojnë si një opozitë konstruktive.
“Të gjithë e kanë të qartë se pasi Ali Ahmeti e ka kuptuar se e ka humbur pushtetin, e ka humbur dhe kontrollin, por i bëjmë thirrje që, nëse e do perspektivën europiane të vendit, duhet të rrijë i qetë, të udhëzojë partnerët e Frontit multietnik që bashkërisht të jenë opozitë konstruktive, të mbështesin çështjet që janë në interes të shqiptarëve, siç kanë bërë partitë e VLEN-it si opozitë e deritanishme dhe të lejojnë që drejtësia të veprojë. Kur drejtësia vepron sipas ligjit, atëherë rruga eurintegruese e vendit është e garantuar”, thonë nga VLEN.
Televizioni 21 dërgoi pyetje edhe deri tek LSDM dhe VMRO-DPMNE për atë se çfarë planesh po thurin, mirëpo nga asnjëra pale nuk ishin të disponueshme për t’u përgjigjur.
Përndryshe, më 22 maj ditën e mërkurë është vendosur që të rivotohet në gjashtë vendvotime në zonën e pestë zgjedhore dhe një vendvotim në zonën e gjashtë zgjedhore. Nëse koalicioni VLEN në Zhelinë dhe LSDM në zonën pesë arrijnë të korrin fitore më të thellë, atëherë mund t’I marrin dy deputetë nga Fronti Europian. Në këtë rast, Fronti Europian mund të përfundojë me 17 deputetë.