Ahmeti: Gjykim ndaj UÇK-së, e jo ndaj individëve! “Gur mbas guri bëhet kalaja, fjalë pas fjale nis belaja”

Procesi gjyqësor që po zhvillohet në Hagë nuk është kundër individëve, por ndaj Ushtrisë Çlirimtare të Kosovës, shprehet kreu i BDI-së Ali Ahmeti, duke sqaruar se këtë e ka kuptuar nga fjalët e prokurorit.

Ali Ahmeti: “Atë që e pash në fillim, “grup kriminal” e quajtën si tërësi Shtabin e Përgjithshëm të UÇK-së, që nuk përkon me realitetin…

TV21: Do me thënë nuk po thoni se është gjykim kundër individëve?

Ali Ahmeti: “Nuk mendoj se është gjykim kundër individit”.

Duke folur për debatet e fundit mes kryeministrit shqiptar Edi Rama dhe kreut të opozitës Lulzim Basha, për të ashtuquajturën “Shtëpia e verdhë”, Ahmeti bëri thirrje për qetësi dhe organizim.

Ali Ahmeti: “Populli e ka një shprehje shumë të bukur, gur mbas guri bëhet kalaja, fjalë pas fjale nis belaja. Tani ne kemi nevojë të ndërtojmë kala, e jo bela. Fjala-fjalën nuk e mund! Nuk më pëlqen ky debat por shpresoj që të qetësohen palët, e të merren me substancën”.

Kreu integrist tha se nuk e di rolin që mund të ketë pasur Lulëzim Basha në hetimet për të ashtuquajturën Shtëpia e verdhë, por tregoi se e ka ditur që në fillim se ish-shefi i tij i kabinetit, tani zëvendëskryeministri Artan Grubi, ka qenë përkthyes.

TV21: “A ka qenë z.Grubi tamam i përfshirë në hetimet që janë bërë edhe si përkthyes në shtëpinë e verdhë?

Ali Ahmeti: “Unë nuk mendoj se z.Grubi ka qenë hetues. Sigurisht që z.Grubi materien e ka njohur sepse është naivitet që të them se z.Grubi nuk e ka njohur përderisa ka qenë si përkthyes dhe sigurisht se ka komunikuar me njerëzit që janë intervsituar”.

Gjykimin në Hagë Ahmeti e quan moment të vështirë. Pavarësisht se Gjykata Speciale është votuar nga Kuvendi i Kosovës, thotë se ajo është ndërkombëtare.  I pyetur nëse i beson drejtësisë ndërkombëtare, u përgjigj me “sigurisht se po”. Sipas tij nuk ka pasur zgjidhje tjetër përveç themelimit të kësaj Gjykate, përndryshe nëse kjo çështje do të hapej në OKB, sipas Ahmetit, pasojat do të ishin katastrofale.