VMRO DPMNE hedh dyshime se ka furnizime të dyshimta në sektorin e sigurisë që i realizon Ministria e punëve të brendshme. Aleksandar Nikolloski nga kjo parti pohon se pikërisht në këtë sektor bëhen furnizime me kompani që janë në listën e zeze të SHBA-ve, por nuk zbulojnë më shumë detaje.
“Nga njëra anë vazhdimisht flasin për BE-në, NATO, orientimin pro perëndimor etj, ndërsa nga ana tjetër japin furnizime të ndjeshme në sektorët e sigurisë, kompanive që janë në listën e zeze të SHBA-ve. Në sektorin e sigurisë ka furnizime që i kanë bërë kompani të lidhura me kompani të tjera që janë në listën e zeze të SHBA-ve”, tha Aleksandar Nikollovski, nënkryetar i VMRO-DPMNE-së.
Por, ministri i Punëve të Brendshme, Oliver Spasovski i hodhi poshtë këto akuza dhe tha se të gjitha furnizimet janë transparente, kurse furnizimet për sektorin e sigurisë janë pak në numër.
“Të gjitha furnizimet që bëhen publikohen në Byronë për Furnizime Publike. Mund të bëni kontroll për çdo furnizim të realizuar, kështu që në këtë aspekt absolutisht procedurat po zbatohen në mënyrë transparente. Tani, sa u takon furnizimeve në pjesën e sigurisë, ato janë pak në numër dhe kompanitë që gjenden në listën e zezë, për momentin nuk bashkëpunojnë me Ministrinë“, theksoi Oliver Spasovski, ministër i Punëve të Brendshme.
Ministria e Financave e SHBA-ve në dhjetor publikoi një listë të zezë të zgjeruar të personave dhe kompanive nga Serbia, Kroacia, Kosova dhe Bullgaria që lidhen me korrupsion, kurse më vonë në këtë listë ishin shtuar edhe disa kompani nga Bosnja dhe Hercegovina, në të cilën figuronte edhe anëtari i Presidencës, Millorad Dodik.