Adem Demaçi “rikthehet” në Shkup/ Në përurimin e rrugës edhe kryeministri i Kosovës Albin Kurti

Kjo rrugë e Çairit deri tani quhej “Brigada e dytë sulmuese maqedonase”, po prej sot mban emrin e veprimtarit  Adem Demaçi, i cili një pjesë të shkurtër të jetës së tij ka qëndruar në një prej familjeve në këtë rrugë të Shkupit.

 Për inaugurimin e saj erdhi kryeministri i Republikës së Kosovës, Albin Kurtin.

Në fjalimin e tij Kurti përshkroi periudhën kur veprimtari Adem Demaçi ishte i detyruar të mbrojë të drejtat e shqiptarëve, sepse siç tha, shqiptarët ishin popull i shtypur nga regjimi i atëhershëm. Sipas tij, emërtimi i kësaj rruge me emrin e Adem Demaçit, paraqet akt këmbëngulje në përpjekjet të një populli për liri.

“Ajo kohë e shtypjes së shqiptarëve në ish-Jugosllavi, mes shqiptarëve e prodhoi një simbol të lirisë, bacin Adem Demaçi. Gazetari dhe intelektuali, shkrimtari dhe veprimtari Adem Demaçi, me shkrimet dhe aktivitetet e tij publik dhe të fshehtë që i kushtuan plot 28 vite të kaluara nëpër burgje u bë simbol i rezistencës së pa epur ndaj shtypjes dhe shfrytëzimit ndaj përpjekjes së pandalshme për liri të shqiptarëve në ish-Jugosllavi. Andaj emri Adem Demaçi përtej emër personi ishte edhe emër figure. Ishte parullë më vete.”- deklaroi Albin Kurti, Kryeministër i Kosovës.

Kryetari i komunës, Visar Ganiu, tha se çdokush që do të kalojë tani në këtë pjesë të Çairit, do të rikujtojë rrugëtimin e Demaçit drejt lirisë.

“Meqë çdo herë kur do të shkelim në këtë rrugë jo vetëm ne qytetarët e Çairit por edhe të mbarë hapësirave shqiptare du të kujtojmë rrugëtimin e Demaçit drejt lirisë. Do të rikujtojmë se ky njeri 1/3 e jetës e kaloi i privuar nga liria. Por shpirti i tij mbeti i lirë, përjetësisht.”- tha Visar Ganiu, Kryetar i Komunës së Çairit.

E pranishme ishte edhe mbesa e Adem Demaçit, Fitore Shahini. Ajo falenderoi shkupjanet për këtë akt.

“I falënderoj qytetarët e Shkupit që e kanë bërë një hap të tillë, ta përkujtojnë një njeri që ka vdekur. Të punojnë rreth një pune shumë të madhe dhe të emërohet një rrugë në emrin e tij.”- tha Fitore Shahini, mbesa e Adem Demaçit.

Në Çair, përpos nga Ganiu, Kurti u mirëprit edhe nga tre liderët e partive opozitare shqiptare të cilët së fundmi lidhën bashkëpunim opozitar, Izet Mexhiti e Lidhjes Demokratike, Afrim Gashi e Alternativës dhe Bilall Kasami e Lëvizjes Besa. Përfaqësues të partive të tjera nuk u panë.