Kryetari i Lidhjes Demokratike të Kosovës, Lumir Abdixhiku, ka reaguar pas Kuvendit të partisë, respektivisht pasi i mbijetoi tentativës për ta shkarkuar nga pozita e kryetarit, përcjell TV21. Ai thotë se tashmë fokusi duhet të jetë te bashkimi i LDK-së. Abdixhiku tha se kishte vlerësuar më herët se Kuvendi ishte i panevojshëm dhe i ngutshëm, por se vendimi i marrë i takon së shkuarës. Ai theksoi se LDK duhet të vazhdojë të udhëhiqet nga dialogu, maturia dhe respekti për mendimin ndryshe.
“Në LDK, fjala e fundit i takon gjithmonë anëtarësisë. Mbrëmë ajo foli. Kam besuar se ky Kuvend ishte i panevojshëm, i dëmshëm e i ngutshëm. Sot, ai i përket së shkuarës. E pranoj me përulësi vendimin e delegatëve dhe e marr atë si një përgjegjësi të re për ta ruajtur me fanatizëm kahjen e LDK-së. LDK mbetet veç e anëtarësisë dhe ky është verdikti më thelbësor që dha LDK-ja mbrëmë. Kjo periudhë na sprovoi. Por sprovat nuk duhet të na ndryshojnë vlerat. LDK-ja është ndërtuar mbi kulturën e dialogut, të maturisë dhe të respektit për mendimin ndryshe. Pikërisht këto vlera duhet të na udhëheqin edhe tani. Prandaj sot kam vetëm mirënjohje. Mirënjohje për ata që më besuan. Po aq mirënjohje edhe për ata që menduan ndryshe. Demokracia nuk kërkon njëzëshmëri; ajo kërkon respekt. Tani, më ndihmoni të gjithë, të bashkojmë këtë shtëpi; dhe nga këtu të bashkojmë dhe gjithë Kosovën. Ky është roli ynë si LDK e vërtetë. Rolet tjera nuk na përkasin neve. LDK ka nevoje për bashkim; gjersa Republika ka nevojë për stabilitet institucional, për institucione funksionale dhe për një politikë që vendos interesin shtetëror mbi çdo llogari tjetër. Ky do të mbetet orientimi ynë. Kështu njihet LDK. Mbrëmë mbyllëm një kapitull. Sot fillojmë punën, së bashku. Për LDK-në e anëtarësisë. Për Republikën e popullit tonë”, shkroi Abdixhiku.