A po prolongohet viti shkollor? Kjo është pyetja që po qarkullon më së shumti në publik, pasi Komisioni për Sëmundje ngjitëse dhe Ministria e Arsimit dhe Shkencës nuk po arrijnë zgjidhje për atë se si duhet të zhvillohet viti shkollor.
Siç mësojmë, pengesat më të mëdha janë në mënyrën e realizimit të orëve mësimore, të cilat sipas paralajmërimeve do të zgjasë 20 minuta. Për të hyrë në fuqi kjo, duhet të realizohen ndryshime ligjore, ndërkaq Kuvendi nuk është funksional.
Për të gjitha këto dilema kontaktuam Ministrinë e Arsimit dhe Shkencës, por nga atje të pakapshëm për komentim.
Derisa institucionet heshtin, në rrjete sociale shpërndahen peticione. Në njërin prej tyre kërkohet viti shkollor të realizohet në distancë.
“Duke e pasur parasysh situatën me Covid-19 në shtet dhe ndikimin e tij në jetën e njeriut, si dhe prindër të brengosur për shëndetin e fëmijëve të tyre, familjes, kuadrit arsimor dhe shëndetin publik, kërkojmë që viti shkollor të realizohet Onlajn – mësim në distancë”, thuhet në peticionin e prindërve.
Por, kundër këtij peticioni kanë dalë grup tjetër i prindërve, të cilët kërkojnë kthimin e fëmijëve në shkolla nën masa kundër Kovid-19. Janë të pakënaqur edhe për shkurtim të orëve mësimore nga 40 në 20 minuta.
Ndërkaq, ministri i Arsimit dhe Shkencës, Arbër Ademi ishte i bindur se viti shkollor do të fillojë më 1 shtator.
“Ne përgatitemi që viti shkollor të fillojë nga 1 shtatori. Se a kemi kohë të mjaftueshme, sigurisht se kemi. Kemi kohë para nesh që të fillojë viti shkollor me kohë dhe draft protokollet njëherë janë shqyrtuar nga ana e Komisioni për sëmundje ngjitëse, u është dhënë dritë e gjelbër. Këtë të mërkurë ne kemi diskutuar këto modalitete në Shtabin e Krizës për realizimin e procesit arsimor”, deklaroi Ministri i Arsimit dhe Shkencës, Arbër Ademi.
Nga Ministria e Shëndetësisë kanë njoftuar, se Komisioni i ka përgatitur masat për mbrojtje, por vendimi final sërish siç thonë i mbetet Ministrisë së Arsimit dhe Shkencës. Ndërkaq, të gjitha anketat që u publikuan ditëve më parë, tregonin se prindërit, arsimtarët dhe drejtorët e shkollave janë për rikthim të nxënësve në shkolla dhe mësimin online e kanë cilësuar si joefikas.