A kanë BDI-ASh marrëveshje për Kërçovën? “Kush fiton listën e këshilltarëve propozon kandidatin e ardhshëm”

Në zgjedhjet lokale të 2017-tës në Kërçovë, BDI dhe ASh janë marrë vesh që kush fiton listën e këshilltarëve, në zgjedhjet e 2021-shit të ketë të drejtën të propozojë kandidatin e përbashkët për komunën, tha mbrëmë në ClickPlus integristi Kreshnik Bekteshi.  

TV21: Marrëveshje kush me kë bëri, sepse ajo aty është deklaratë.

Kreshnik Bekteshi: BDI-Aleancë.

TV21: Kush z.Ahmeti me z.Sela?

K.B: BDI-Aleancë.

R.M: Kush me cilin?

K.B: U dakorduam që ajo parti politike e cila do të fitojë për listën e këshilltarëve, mandatin e ardhshëm të propozojë kandidatin.

Bekteshi këtë e mbështeste në një deklaratë të kreu të ASh-së, Ziadin Sela, i cili në 2017 kishte deklaruara se “do të dalin me listën e tyre për këshilltarë dhe në zgjedhjet e pas 4 viteve do të duhet që kandidati të jetë i subjektit që fiton me listat për këshilltarë”. Nënkryetari i Aleancës për Shqiptarët, Remzi Mehmedi, tha se marrëveshje nuk ekziston.

“Remzi Mehmedi: Tani deklaratë apo marrëveshje, të lutem, do të flasim me korrektësi apo do të bëjmë lojëra fjalësh.

TV21: Edhe politikisht edhe publikisht ka dallim…

R.M: Të thuash marrëveshje Kreshnik është shpifje dhe mashtrim”.

Nëse opozita shqiptare fiton BDI-në atëherë mandatin e ardhshëm me siguri që BDI do të përkrah cilindo kandidat i cili do të propozohet nga ana e tyre, u shpreh Bekteshi, duke përfunduar se këto janë parime të vendosura të cilave integristët u qëndrojmë prapa, por me keqardhje tha se ASh ka ndryshuar mendimin.

Ministri nga radhët e BDI-së po ashtu tha se shqiptarët rrezikojnë komunën e Kërçovës nëse dalin më shumë se një kandidat, ndërsa Mehmedi u shpreh se do të ishte mirë që të ketë garë dhe të dëgjohen ofertat. Sa i përket kandidaturës së opozitës shqiptare për Kërçovën, Mehmedi tha se ende nuk është vendosur për emrin, ndërsa nuk përjashtohet mundësia që të jetë një emër nga diaspora./TV21