A janë paguar hakerët që sulmuan sistemin e FSSH-së?! Drejtoresha thotë se është hapur hetim, nuk dëshiron të komentojë detajet

Më në fund nga FSSH dolën për të folur për bllokimin e sistemit. Në pyetjen se a e kanë paguar hakerin për të debllokuar sistemin, drejtoresha Magdalena Filipovska Grashkovska as nuk e mohoi e as nuk e pohoi. Sipas saj është hapur hetim dhe për këtë shkak nuk mund të jep përgjigje.

“Ashtu siç ju thash edhe më herët të gjitha këto pyetje janë lëndë e hetimit. Kur të mbarojë do të keni përgjigje për gjithçka. Unë me të vërtetë nuk jam IT dhe nuk e di nëse do t’i përdor termet e duhura që mos të keqinterpretohem. Sulmi ishte i drejtuar vetëm kah sistemet virtuale, por jo edhe në të dhënat. Të dhënat e qytetarëve ruhen në formë të maskuar dhe nuk janë të lexueshme me sy pa u lidhur me serverin aplikativ të cilët në rastin tonë nuk ishin të prekur nga ky sulm.”- deklaroi Magdalena Filipovska Grashkovska – U.D. Drejtoreshë e Fondit Shëndetësor.
Edhe pse nuk dha asnjë informacion në lidhje me mënyrën e zgjidhjes së problemit drejtoresha siguron se të dhënat e qytetarëve janë të sigurta dhe se sistemi tani është thuajse plotësisht funksional.
“Dua të përsërisë se të dhënat personale dhe shëndetësore janë të sigurta dhe qytetarët pa pengesa mund t’i realizojnë të drejtat e tyre. Gjithashtu sistemi i fondit është kthyer thuajse në normalitet dhe janë paguar pagat e punonjësve shëndetësor, por edhe pushimet mjekësore dhe ato të lindjes si dhe refundimet e ndryshme.”- tha Magdalena Filipovska Grashkovska – U.D. Drejtoreshë e Fondit Shëndetësor.

Por, habit fakti që pikërisht kur ndodhi sulmi kibernetik, në vendin e tij të punës nuk ishte drejtori i Sektorit për Informatikë, Sasho Stançevski. Drejtoresha tha se është në pushim mjekësorë për shkak të stresit të përjetuar nga sulmi. Gjatë kësaj kohe i pranishëm nuk ka qenë as drejtori tjetër i Fondit Faton Ahmeti, i cili ndodhet në pushim vjetor. Filipovska – Grashkovska njoftoi se për diagnostikimin e problemit janë angazhuar edhe IT ekspertë të huaj.
Ndryshe, për afër 2 javë sistemi i Fondit Shëndetësorë ishte jashtë funksionit për shkak të sulmit kibernetik si pasojë e së cilit nuk mund të paguheshin pushimet mjekësore, të lindjes si dhe pagat e punonjësve shëndetësorë.