A është në radhë Telekomi për shitje?! Pas paralajmërimeve për shitje të Ndërmarrjeve publike të cilat sipas Qeverisë nuk punojnë me profit, informacioni për shitjen e Telekomit tashmë një periudhë të caktuar po qarkullon në opinion. Nga kjo ndërmarrje tani për tani heshtin. Por nga Qeveria tashmë nuk mohojnë. Ky do të jetë opsion, por nëse tregohet që modeli i tanishëm nuk prodhon vlerë të shtuar për shtetin, deklaroi para disa kohe në Klik Plus në TV21, zv.kryeministri për çështje ekonomike, Fatmir Bytyqi.
“Nëse këtë e konfirmojmë. Ne ende nuk kemi ofertë zyrtare për këtë. E di se ka disa spekulime, por nëse modeli që do të ofrohet, ka edhe vlerë shtesë jo vetëm në anën e të ardhurave”, theksoi Fatmir Bytyqi – zëvendëskryeministër për Çështje Ekonomike.
Sipas Bytyqit qëllimi nuk është që të gjenden të ardhura shtetërore vetëm për një vit. Unë nuk mendoj vetëm për një vit, mendoj për periudhë më të gjatë, tha zëvendës kryeministri.
“Unë siç thash nuk mendoj vetëm për 1 vjet, mendoj për periudhë më të gjatë. Ne i zgjidhim problemet për shkak se nga ana e shpenzimeve na merren mjetet në periudhë më të gjatë dhe duam të gjejmë modele me të cilat në anën e të ardhurave do të sigurojnë të ardhura në periudhë më të gjatë kohore për shkak se ashtu zgjidhen problemet sistematike në një shtet”, u shpreh zëvendëskryeministri për Çështje Ekonomike, Fatmir Bytyqi.
Shteti mund ta shes pjesën e vet në këtë kompani, thotë ish ministri i financave, Kiril Minovski, por porositi se gjatë vendimit të tillë duhet të definohet në mënyrë precize qëllimi që duhet të arrihet.
“Mjetet që do të fitohen nga shitja do të shkonin për pagesën e një pjese të borxheve që i ka shteti… të shihet nëse në këtë moment duhet të bëhet shitja e asaj pjese që e ka shteti. Më së shpeshti në kushte të krizës nuk shiten mjete. Duhet të pritet për kohë më të mira, e më tej do të mendohet për shitje eventuale, për shkak se shuma që mund të merret sigurisht do të jetë më e lartë në rrethana normale”, tha Kiril Minovski – ish-ministër i Financave.
Përndryshe mjetet nga shitja e pjesës shtetërore në Telekom që është 34,8%, sipas informacioneve jozyrtare do të shfrytëzohet për mbushjen e “vrimave” buxhetore dhe zbutjen e pasojave financiare nga korona kriza. Sipas ekonomistëve, shuma prej rreth 300 milion eurove, që shteti mund t’i marrë nga shitja e pjesës në Telekom, është e ulët dhe Qeveria me këto para mund të mbulojë vetëm një pjesë të nevojave të saja. Kjo sipas njohësve të kësaj problematike, do të thotë vetëm arrnim e jo sanim i “vrimave” buxhetore.