A e shpalli Neziri Grubin kryeministër shqiptar? Ahmeti: Nuk ia kam ofruar Taravarit postin, është lajm i rrejshëm

Kryeministër shqiptar e quajti mbrëmë kryetari i degës së Çairit, Bekim Neziri, zv.kryeministrin e parë nga radhët e BDI-së, Artan Grubin. Ky i fundit buzëqeshet bashkë me kreun e partisë, Ali Ahmeti.

Por në ç’kuptim e pati Neziri kur Grubin e quajti kryeministër? E spjegon në Click Plus.

“Unë nuk e shpalla z. Zv.kryeministrin e parë, kryeministër të vendit por nëse shiqohet nga këndvështrimi, pasi ai është funksioni i zv.kryeministrit të parë është funksioni më i lartë”, tha Bekim Neziri – Kryetar dege Çair-BDI.
Dmth, në atë konotacion e keni thënë? Jo qe keni aluduar se ndoshta ky është kryeministri i Qeverisë teknike përshembull?

“Jo jo! BDI ka strukturat e veta vendosëse dhe besoj që kur të vjen momenti për të vendosur për kryeministër të ardhshëm shqiptar, opinioni i gjerë do të informohet për këtë gjë”, pohoi tha Bekim Neziri – Kryetar dege Çair-BDI.

Por kush do të jetë kryeministri i parë shqiptar? Kreu i Bashkimit Demokratik për Integrim, Ali Ahmeti, edhe personalisht i demantoi spekulimet se këtë post i’a ka ofruar kreut të ASH-së, Arben Taravari.

“Sigurisht se këtë çështje e ka demantuar edhe z.Taravari. Është një lajm i rrejshëm dhe nuk ka të bëjë asgjë me të vërtetën”, tha Ali Ahmeti – Kryetar i BDI-së.

E pyetëm nëse mund të jetë Fatmir Bytyqi kandidat, apo ndoshta edhe Naser Ziberi?

“Akoma nuk është menduar, por nuk besoj që do të jetë jashtë radhëve të BDI-së. Tani, z.Ziberi është avokat i popullit”, pohoi Ali Ahmeti – Kryetar i BDI-së.

Ahmeti shtoi se kjo marrëveshje është mes BDI-së e LSDM-së, dhe propozimi i BDI-së për kryeministër shqiptar do të konsultohet po me atë parti.