Maqedonia nuk ka ndërtuar qëndrim shtetëror se çfarë negociata paqësore për Ukrainë përkrah. Dilema u ngrit pasi presidenti i ri amerikan Donald Tramp filloi proces për negociata me Moskë, por në tryezë ishin ftuar edhe krerët e BE-së të cilët insistojnë që Unioni të jetë pjesë e negociatave. A do t’i përkrahim qëndrimet e Brukselit ose të Uashingtonit, zv/kryeministri Izet Mexhiti u përgjigj shkurt:
“Ne si aktorë jemi shtet i vogël, por qartësisht e kemi gjykuar pushtimin rus dhe gjithçka që është në favor të paqes dhe mbrojtjes së kufijve dhe integritetit të Ukrainës, ne e përkrahim”, tha Izet Mexhiti.
Tensionet në relacion Bruksel-Uashington u ngritën pasi nënpresidenti amerikan Xhej Di Vans në Konferencën e sigurisë në Munih e kritikoi BE-në. Nga fjalimi i tij të pakënaqur u shprehën shumica e krerëve të vendeve anëtare të BE-së. Megjithatë kryeministri Mickoski i shfrytëzoi tensionet e nënpresidentit amerikan për ta kritikuar Brukselin për zgjerimin e Unionit.
“Mbajti fjalim në ditën e parë, në hapjen, nënpresidenti Xh.D. Vans dhe dëgjoj zëra se ky fjalim paraqet përzierje në disa çështje të brendshme. Ndryshimi i emrit, ndryshimi i flamurit, i valutës, çfarë është kjo? A nuk është kjo përzierje në punët e brendshme?”, deklaroi Hristijan Mickoski
Nëse Maqedonia do të përkrahë një nga palët, kohë më parë në një intervistë u pyet edhe kryeparlamentari Afrim Gashi.
“Pas këtyre ngjarjeve unë mendoj se miqtë tanë nuk do të na vënë në pozitë që ne të zgjedhim. Unë mendoj se në asnjë rast nuk duhet të përcaktohemi për njërën apo tjetrën palë. Unë mendoj se është çështje strategjike, në interes të shtetit tonë dhe qytetarëve tanë që ne të vazhdojmë të hapërojmë me dy këmbë – me Brukselin dhe Uashingtonin”, theksoi Afrim Gashi.
Së fundmi, ambasadorja e SHBA-ve, Anxhela Ageler theksoi se është e kënaqur që Mickoski përsëri është në Uashington për shkak se duhet theksuar bashkëpunimi dypalësh. Mickoski është në SHBA në konferencë të partive konservatore, ku do të flasë nënpresidenti i SHBA-ve Xhej Di Vans, udhëheqësi i daljes së Britanisë nga BE, Najxhel Farazh, kryeministri i Sllovakisë Robert Fico i cili nuk është mes përkrahësve të Ukrainës dhe të tjerë.