A do ta ngrenë zërin partitë për heqjen e 20%shit? BDI hesht, Alternativa dhe Besa e mirëpresin idenë e Llogës

Bashkimi Demokratik për Integrim hesht dhe nuk përgjigjet nëse me ndryshimet kushtetuese për futjen e bullgarëve në Kushtetutë, të hiqet edhe definicioni 20% që definon shqiptarët.

Ditë më parë ministri nga radhët e kësaj partie, Bujar Osmani, tha se prioritet në këto ndryshime kushtetuese është futja e bullgarëve, duke e cilësuar si jo të mirë idenë e ministrit të drejtësisë Krenar Lloga që bashkë me futjen e bullgarëve Kushtetuta të pësojë edhe disa ndryshime të tjera, përfshirë këtu edhe heqjen e definicionit 20%. Megjithatë sot Osmani, i pyetur nga TV21 si zëdhënës i partisë, nuk u përgjigj nëse BDI- në Kuvend është e gatshme ta ngrejë zërin në Kuvend për heqjen 20%shit. Përgjigje nuk morën as nga shefi i grupit parlamentar Arbër Ademi dhe deputetja Arta Bilalli-Zendeli.

Nga ana tjetër, partnerët e rinj Qeverisës, Aleanca për Shqiptarët, nga ku vjen edhe ministri Lloga, thonë se ata do të propozojnë një gjë të tillë, ndërsa për të njëjtën presim mbështetjen e të gjitha partive shqiptare.

“Aleanca për Shqiptarët në grupin punues do të propozojë heqjen e 20% dhe emërtimin e drejtë të gjuhës shqipe. Jemi të bindur se ky propozim do të kalojë unanimisht, pasi të gjitha partitë shqiptare janë zotëruar botërisht, ndërsa edhe në takimin e fundit liderëve, si zotëri Kovaçevski edhe zotëri Mickoski, nuk kundërshtuan propozimin tonë. Përkundrazi, në disa paraqitje publike dhe intervista dy liderët madje edhe kanë shprehur qëndrimet pro heqjes së termit 20%”.

Dy partitë opozitare shqiptare, Alternativa dhe Lëvizja Besa shprehen të gatshme që në vazhdën e ndryshimeve kushtetuese për futjen e bullgarëve të hiqet edhe 20%-shi.

“Ne e kemi thënë qëmoti se jemi të gatshëm ta mbështesim propozimin për heqjen e 20%-shit dhe për këtë nuk kemi nevojë për grupe pune. Megjithatë, ministri Lloga më duket se duhet t’i bindë partnerët e tij para se të flasë për grupe pune me opozitën. Deri tash ai nuk e ka mbështetjen e LSDM-së dhe BDI-së dhe ne kemi drojë se edhe ai vetë do të lëkundet”.

Edhe nga Lëvizja Besa thonë se mbeten konsistent në qëndrimet se me hapjen e kushtetutës duhet të korrigjohen edhe deformimet terminologjike që kanë të bëjnë me definimin e gjuhës shqipe. Deputeti Fadil Zendeli nëpërmjet një shkrimi në Facebook i ka bërë thirrje ministrit Lloga që t’i mbetet besnik deklaratës se me inicimin e ndryshimeve kushtetuese në Kuvend, duhet të hiqet formulimi 20% për përdorimin e gjuhës shqipe.

“Tash e ke rastin që përmes qeverisë si propozues i autorizuar i ndryshimeve kushtetuese, në kuvend të kemi propozim për ndryshimin e Amendamentit V të Kushtetutës së RMV. Lëvizja Besa mbetet besnik qëndrimit të theksuar më herët se do të përkrahë ndryshime kushtetuese vetëm nëse do të përkrahet iniciativa për ndryshimin e amendamentit V të kushtetutës ku formulimi 20% hiqet dhe do të emërtohet si gjuhë shqipe”.

TV21 sot sërish kërkoi përgjigje nga kabineti i Ministrit të Drejtësisë Krenar Lloga nëse mbetet në qëndrimin për pako për ndryshimet kushtetuese përfshirë edhe 20%-shin. Nga atje shkurt u përgjigjën se ministri mbetet në qëndrimin e kumtuar ditë më parë, ndërsa propozimet konkrete për ndryshimet kushtetuese do të zyrtarizohen kur të fillojë me punë grupi punues.