Bota, si dhe në Maqedoni, po shënon 80-vjetorin e fitores mbi fashizmin, kur Lufta e Dytë Botërore përfundoi me kapitullimin e Gjermanisë naziste. Përfaqësues të Lidhjes së Luftëtarëve, delegacione shtetërore, kori diplomatik, si dhe organizata të shumta bënë homazhe për partizanët e rënë te përmendorja në varrezat partizane në Butel. Zëvendëskryeministri për Sistemin Politik, Lupço Dimovski, tha se luftëtarët e lirisë që dhanë jetën për liri janë themeli i vendit tonë.
“Kjo ditë përfaqëson realizimin e idesë sonë për një Maqedoni të pavarur. Kjo është ideja që ishte motivi kryesor për të gjithë pjesëmarrësit maqedonas në vorbullën e luftës, ideja që i forcoi ata përmes të gjitha sprovave, sfidave dhe betejave”, tha Lupço Dimovski.
Ministri i çështjeve europiane Orhan Murtezani rikujtoi se heronjtë maqedonas ishin pjesë e luftës kundër fashizmit duke dhënë jetët e tyre për liri.
“9 maji është një ditë me simbolikë të thellë, e fitores mbi fashizmin, por edhe dita e lindjes së idesë së një Europe të bashkuar dhe paqësore. Si Ministër për Çështje Europiane, dua të them se e ardhmja jonë europiane nuk është një deklaratë, është një vendim”, tha Orhan Murtezani.
Mesazh për ditën e sotme dërgoi edhe Ministri i Mbrojtjes Vllado Misajllovski, i cili tha se sakrifica e partizanëve nuk është shkruar vetëm në librat e historisë, por është pjesë e identitetit tonë.
“Ky vend është thjesht një vend i shenjtë, sepse këtu u bëjmë homazh atyre që ndihmuan në përfundimin e tmerreve të Luftës së Dytë Botërore. Por me sakrificën e tyre, ata patën gjithashtu një kontribut të padyshimtë në hedhjen e themeleve të vizionit për Europën”, deklaroi Vllado Misajllovski.
Tetë dekada më parë, Gjermania e atëhershme naziste nënshkroi një kapitullim pa kushte, duke i dhënë fund Luftës së Dytë Botërore. Kjo ditë festohet edhe si Dita e Europës, që paraqet edhe ditë përkujtimi e Deklaratës së Ministrit të Jashtëm Francez Robert Shuman në vitin 1950 me vizionin e tij për një Europë paqësore dhe të bashkuar, që konsiderohet një hap i rëndësishëm në formimin e Bashkimit Europian.