Ky është Cvetan Mojsovski. Nesër do ta festojë ditëlindjen e tij të 79-të.
Ai çdo ditë vjen në kejin e Vardarit për të ushtruar, duke e mbajtur trupin e tij në formë. Thotë se ndjehet i shëndetshëm. Kur ushtroj s’ka nevojë të mbaj maskë, shton ai.
“Kur bëhet sport, s’ka nevojë për maskë. Jemi në ambient të hapur dhe është mirë. Përveç kësaj, unë jam profesionist në këtë fushë, respektivisht për edukatën fizike. Mund edhe të vrapoj, edhe të ushtroj”, tha Cvetan Mojsovski.
Në kej nuk mungoi as zhurma e fëmijëve. Disa me biçikletë, e disa me skejtbordë. Disa qytetarë kishin dalë për t’u shëtitur me fëmijët, kurse disa të tjerë me qenushat e tyre. Kishte edhe të tillë të cilët bënin ushtrime apo vraponin.
Shumë qytetarë kanë dalë të shëtisin në parkun e qytetit për të shfrytëzuar vikendin dhe motin e bukur. Ky është vikendi i parë që kur Qeveria mori vendim për ndalesë të grupimit të më shumë se katër personave në vende publike.
Para katër ditëve Qeveria solli vendim me të cilin ndalohet grupimi i më shumë se katër personave në vende publike, respektivisht në parqe, zona publike ose kudo në të hapur gjatë gjithë ditës. Po, kjo nuk vlen për prindërit me fëmijë nga e njëjta familje ose për qytetarët të cilët bëjnë ushtrime.