6 orë në mbrojtje të akuzave për rasti “Monstra”! “Betohem që këtë vepër nuk e kam bërë”

Gati 6 orë avokatët mbrojtës të të akuzuarve në rastin “Monstra” thanë fjalët e tyre përfundimtare, ndërsa vetë të akuzuarit shkurt thanë se nuk janë vrasësit e 5 viktimave në Liqenin e Smillkovës. Ata kërkuan që gjykata të vendosë drejtë.

“Duke pasur parasysh se 9 vite më zvarrisin çdo ditë gjyqeve, kërkoj nga gjykata të vendoset në vendin tim, të ulet këtu në vendin tim dhe pastaj të vlerësojë çfarë nënkupton kjo të të zvarrisin 9 vite. E mohoj kategorikisht se jam i përfshirë në këtë rast”, tha Aziri.

“Pajtohem me fjalët përfundimtare të mbrojtjes time dhe kërkoj nga gjykata që të sjell vendim për lirimin tim”, shtoi Aziri.

E Agim Ismailoviq, për të cilin kërkohet dënim të përjetshëm u betua se ai nuk kishte kryer vrasje.

“Si betoheni ju në drejtësinë tuaj, betohem edhe unë që këtë vepër nuk e kam bërë….i kam dy fëmijë…nëse  nuk do të dëshiroja që fëmijëve të mi të ju ndodhte ajo gjë…ashtu edhe të tjerëve…më kanë bërë test një javë para se të më arrestojnë, kemi qenë ne të dy me Hakiun, parashtrohet pyetja pse nuk na arrestuan atë ditë mua dhe Afrimin nëse do të kishte dëshmi”, deklaroi Ismailoviq.

Edhe avokati Raufi mbetet në fjalët që ka thënë gjatë gjithë procesit se rasti është i montuar. Ai kontestoi provat e prokurorisë por edhe vetë aktakuzën, duke thënë se prokuroria nuk arriti për gjatë gjithë procesit të gjej as motivin e vrasjes e as vrasësit e vërtetë.

“Jemi të bindur thellë se bëhet fjalë për rast të instrumentuar, megjithatë mbetet obligimi i prokurorisë , fajin ta dëshmojë jashtë çfarëdo dyshimi racional. Parashtrohet pyetja nëse përfaqësuesit e aktakuzës me fjalën e tyre “aktakuzë të  precizuar” e qartë se bëhet fjalë për ndryshim të akuzës, kanë arritur këtë gjë, përgjigja është jo”, tha Raufi.

Nga ana tjetër avokatët e familjareve të viktimave, kërkuan dënim maksimal për të akuzuarit, pasi siç thanë u dëshmuan veprat penale. Mes tjerash  Ivanovska tha se rigjykimi nuk ndryshoi asgjë vetëm se u stërzgjat procesi.

“Nga të gjitha dëshmitë e prezantua si verbale edhe materiale gjatë gjithë procesit gjyqësor, pa dyshim që u vërtetua se në veprimet e të akuzuarve përbëhen elementet thelbësore të ligjit për veprat penale për të cilat akuzohen”, deklaroi Ivanovska.

E përderisa mbahej seanca gjyqësore, gjatë gjithë kohës gjykata Penale ishte e rrethuar me forca të shtuara policore, për ruajte të rendit nëse eventualisht do të ndodhte ndonjë gjë.  Aktgjykimi për rastin “Montsra” është caktuar për me 23 shkurt.