4500 amendamente për bllokimin e pakos ekonomike! Zejdi nuk lëshon pe! Bekteshi thotë se janë të gatshëm për të diskutuar

Ministri i Ekonomisë, Kreshnik Bekteshi, shprehet i bindur se këtë javë do të  gjendet zgjidhje për pakon e 5 ekonomike. Ai shtoi se opozita maqedonase ka votuar nevojën për miratimin e ligjit për pakon e pestë ekonomike, por opozita shqiptare do ta bllokojë në Komisionin për financa dhe buxhet.

“Shihet qartë se qëllimi i tyre nuk është të gjendet zgjidhje, por është bllokim i çdo mase që është në interes të qytetarëve, sipërmarrësve dhe punëtorëve në sektorin privat. Ne si Ministri jemi të gatshëm që edhe ne kuadër të Kuvendit të bisedojmë me të gjithë anët me të gjithë partitë politike, me të vetmin qëllim që të gjejmë një zgjidhje”, u shpreh Kreshnik Bekteshi, ministër i Ekonomisë.

Bekteshi tha se janë të gatshëm  që në kuadër të procedurës në Komisionin amë të intervenojnë në zgjatjen e afateve për aplikim të kompanive për sigurim të subvencioneve për paga.

Por koalicioni AAA-ASH nuk heqin dorë nga kërkesa e tyre. Ata në Komisionin për financa dhe buxhet kanë dorëzuar mijëra amendamente për të zvarritur ligjin me çka në ndërkohë të gjendet zgjidhje për ligjin për shtetësi.

“Pakon e pestë e zhbllokoi shumica dhe opozita maqedonase, ku u dëshmua se për një çështje të rëndësishme shumë shpejtë mund të merren vesh. Gjithsesi është dashur që edhe për një çështje  shumë të rëndësishme siç është ligji për shtetësi të ulemi të merremi vesh. Ne kemi dërguar diku 4500 amendamente nëse nuk gabohem. Amendamente do të duhet të përkthehen, të përgatitën dhe ka hapësirë për të diskutuar mes nesh dhe pozitës që të gjejmë një zgjidhje për ligjin për shtetësi”, tha Skender Rexhepi, koordinator i grupit parlamentar i AAA-ASH-së.

Bekteshi u shpreh i gatshëm që të diskutojë me opozitën për pakon  e pestë ekonomike për të arritur një kompromis, por tha, “së paku le të propozojnë zgjidhje ligjore”. Javën e kaluar, me 87 vota pro, asnjë kundër dhe asnjë  të përmbajtur Kuvendi zhbllokoi Ligjin për pako e pestë ekonomike.