28 persona të dyshuar për tra’gjedinë! Kocevski: Rrënjët janë te korrupsioni i thellë në sistem

Gjithsej 28 persona tani për tani janë dyshuar për tragjedinë në Koçan, njoftoi kryeprokurori Lupço Kocevski në intervistë për gazeta serbe “Politika”. Ai thekson se pjesa më e madhe prej tyre janë të dyshuar për veprën “vepra të rënda kundër sigurisë së përgjithshme” për çka dënimi me burg është 20 vjet. Kocevski shton se hetohen dyshime edhe për veprën “marrje dhe dhënie ryshfet”, “përdorim ilegal i mjeteve piroteknike” etj.

“Deri këtë moment me status “të dyshuar” janë 28 persona, prej të cilëve tre janë në spital, 18 janë në paraburgim në procedurë parahetimore ndërsa 7 nëpunës policorë për të cilët udhëhiqet hetim po ashtu janë në paraburgim”, tha Lupço Kocevski.

Policëve dje iu caktua paraburgim 30 ditor për shkak se kanë nënshkruar dokumente me të cilat kanë mundësuar që kabareja të punojë edhe krahas kushteve të këqija dhe kanë dhënë pëlqim në Ministrinë e Ekonomisë për dhënien e licencës për punë në 2023. Kocevski thotë se do të përgjigjen edhe ata të cilët me mosveprimin dhe mosrealizimin e detyrave zyrtare kanë faj për këtë katastrofë. Sipas tij, abuzimi politik i tragjedisë është diçka e palejueshme.

“Provat që i sigurojmë tregojnë se rrënja është në erozionin e përgjithshëm të sistemit, kulturës së mosrespektimit të ligjeve dhe rregullave por edhe korrupsioni i thellë në sistem”, tha Kocevski.

Në deklaratën e fundit në publik, ministri i brendshëm Pançe Toshkovski paralajmëroi se rritet numri i të dyshuarve.

“Lista e të dyshuarve nuk mbyllet. Pse? Për shkak se po shqyrtohet dokumentacion i vëllimshëm që ka të bëjë me gjendjen penale juridike”, deklaroi Toshkovski.

Përveç të punësuarve në disa institucione që ishin të obliguar për dhënien e licencave dhe kontrolli në terren, në paraburgim mbeten edhe ish zyrtarët Kreshik Bekteshi, Goran Trajkovski, Bekim Maksuti. Prokuroria nesër do të duhet të sjellë vendim të ri – nëse do të kërkohet paraburgim 30 ditor.