Gjatë periudhës së gjendjeve të jashtëzakonshme dhe të krizës, Qeveria ka miratuar 250 dekrete me fuqi ligjore. Këtë e ka bërë të ditur ministri i Drejtësisë, Bojan Mariçiq.
Meqë vendi u gjet papritur dhe pa ndonjë ligj përkatës për gjendjet e jashtëzakonshme, ministri ka njoftuar se tashmë kanë filluar procedurat për përpilim të ligjit.
“Ministria e Drejtësisë ka formuar grup të punës nga profesorë dhe akademikë, të cilët gjatë periudhës së ardhshme do të punojnë në propozim ligj për gjendje të krizë dhe të jashtëzakonshme. Gjatë kësaj jave grupi i punës e ka pasur takimin e parë dhe i ka filluar diskutimet, kurse konferenca e sotme do të jetë një ndihmesë për këto diskutime, për zhvillim të ideve dhe zgjidhjeve ligjore”, tha Mariçiq në konferencën për gjendjet e jashtëzakonshme dhe përvojat, transmeton TV21.
Mariçiq ka njoftuar se Ministria e Drejtësisë ka realizuar edhe analizë për përvojën e institucioneve gjatë gjendjes së krizës dhe të jashtëzakonshme dhe se rezultatet e saja do të publikohen në ueb faqen e Ministrisë.
“Të gjitha këto dërgojnë drejt një përfundimi se duhet zgjidhje urgjente ligjore për gjendjen e jashtëzakonshme, me të cilën do të bëhen të qarta dallimet ndërmjet saj dhe gjendjeve të tjera, si ajo e luftës dhe krizës”, tha Mariçiq.
Zgjidhja ligjore sipas tij duhet të tregojë edhe për momentet, mënyrat dhe procedurat që duhet të ndërmerren nga institucionet në gjendje të krizës, të jashtëzakoshme dhe të luftës.
Mariçiq tregoi se grupi i punës tashmë i formuar duhet të përpilojë propozim tekstin, pas çfarë do të vijojë edhe debat publik./TV21