“25 projekte infrastrukturore brenda vitit në Çair”! Ganiu: Nuk është fushatë parazgjedhore, i kemi marrë mjetet

Kryetari i komunës së Çairit prezantoi disa projekte infrastrukturore. Projektet kryesore përfshijnë rikonstruksionin e 4 rrugëve.

• Rikonstruksionin e rrugës “Parashqevi Qiriazi”
• Rikonstruksionin e rrugës “Dervish Hima”
• Rikonstruksionin e rrugës “Emin Duraku”
• Rikonstruksionin e rrugës “Strumiçka”

Në kumtesë përmendet edhe salla “Partizani” dhe rikonstruksioni i fushës së futbollit në stadiumin e Çairit, ndërsa siç theksohet, në fazën përfundimtare është përgatitja e dokumentacionit teknik për rikonstruksionin e plotë të Parkut të Çairit

I pyetur se a do të realizohen të gjitha këto projekte brenda vitit, Ganiu u përgjigj:

“Jo nuk është fushatë parazgjedhore për shkak se i kemi marrë mjetet të dedikuara për vitin 2024, dmth shpallja e furnizimeve publike është bërë, janë përzgjedhur operatorët.
Janë mbi 25 projekte dhe neve sipas asaj formule na takojnë diku 9 milionë euro. Ne kemi projekte për 10 milionë euro, ndoshta ndonjë prej atyre projekteve duhet të bie, ose në qoftë se ka gatishmëri nga qeveria, diku tjetër mungojnë projekte dhe nuk mund t’i japin të gjitha mjetet, atëherë të kemi mundësi dmth që të gjitha projektet të miratohen”, tha Visar Ganiu.

Vlera totale e këtyre projekteve arrin në 28.6 milionë denarë (465,240 euro) dhe do të financohen nga Qeveria e Republikës së Maqedonisë së Veriut në kuadër të projektit “250 milion euro për komunat.”

Ganiu u ankua nga kryetarja e Qytetit të Shkupit, Danella Arsovska, pasi siç tha, Qyteti i Shkupit ka inkasuar 18 milionë euro nga taksat e banorëve të Çairit, ndërsa Qyteti nuk investoi as 1 milionë euro në këtë komunë.

“Dhe prej vitit 2020 e këndej, dmth ka inkasuar apo absorbuar mjete, apo ka gjeneruar Qytetii Shkupit nga Komuna e Çairit nga taksat dhe të gjitha llojet e komunaleve, diku mbi 18 milionë euro, ndërsa deri më tani nuk është investuar as një milion, shifra nuk ka mbërritur as një milionë euro që është investuar për këto 3 vjet e gjysmë, dhe kjo është një diskriminim i plotë”, deklaroi Ganiu.

Kryetarja Danella Arsovska u kundërpërgjigj duke thënë se taksat komunale janë të ndara proporcionalisht ndërmjet Qytetit të Shkupit dhe Komunës.

“Mjetet që paguajnë personat juridikë dhe fizikë nga Komuna e Çairit në të gjitha bazat për taksa dhe komunale janë të ndara proporcionalisht ndërmjet Qytetit të Shkupit dhe Komunës, dhe ato mjete për tërë mandatin e kaluar nuk kalojnë 1.2 milion në vit për qytetin dhe po aq për komunën e Çairit.Fondet janë investuar në projekte aktuale dhe të reja në infrastrukturë, ujësjellës, gjelbërim, si dhe janë pastruar mbi 40 deponi ilegale”, tha Danella Arsovska – kryetare e Qytetit të Shkupit.

Ganiu dhe Arsovska shpesh here fajësojnë njeri-tjetrin, ndërsa atë e kanë bërë edhe për zgjerimin e rrugës e njohur se “Jahja Pasha”, për të cilën assesi të gjendet zgjidhje.