21 janari, dita kur Shqipëria para 99 vjetëve u shpall republikë

Shpallja Republikë e Shqipërisë, për herë të parë në histori, ndodhi më 21 janar 1925, në 5-vjetorin e fillimit të Kongresit të Lushnjës.

Ahmet Zogu thirri Asamblenë Kombëtare në Tiranë, mbi të cilën kontrolli i tij ishte thuajse i plotë, për të debatuar mbi miratimin e një kushtetute republikane.

62 nga 64 deputetë u bindën për të votuar në favor të një sistemi të tillë qeverisës. Kështu, Republika shqiptare u shpall, me Zogun si president, duke  zëvendësuar regjencën 4-anëtarëshme, e dalë nga Kongresi i Lushnjës (1920), e cila u shfuqizua.

Herën e dytë, Shqipëria u shpall Republikë Popullore më 11 janar 1946, për të kaluar në Republikë Popullore Socialiste në vitin 1976. Hera e tretë që u shpall Republikë ka qenë më 29 prill 1991.

Qytetarët e Shqipërisë tanimë jetojnë në Republikën e tretë. Mirëpo, nuk kanë ndonjë festë, apo rrugë, apo shesh për nder të Republikës, ashtu siç ndodh kudo në vendet republikane nëpër botë. Në kohën e Republikës së parë, një rrugë kryesore quhej rruga e “Republikës”; në kohën e Republikës së dytë, një kinema quhej kinema “Republika”, madje kishte edhe një festë për ditë shpalljen e Republikës, kurse tani përgjatë Republikës së tretë nuk ka asgjë të këtij lloji.