“Dhe mund me siguri t’ju them se viti i ardhshëm do të jetë më i mirë”, deklaroi Dimitar Kovaçevski, kryeministër.
Ky ishte parashikimi i kryeministrit për vitin e ri 2023 në lidhje me ekonominë e vendit, por raportet e Bankës Botërore e flasin të kundërtën. Profesori i ekonomisë Abil Baushi duke u thirrur në raportet e Bankës Botërore thotë se nëse vendi ynë nuk ndërmerr masat e duhura mund të kalojmë në stagflacion ekonomik, që do të thotë kombinim i inflacionit të lartë dhe ngecjes ekonomike.
“Nëse lexojmë raportet e Bankës Botërore ata Maqedoninë e fusin në një alarm shumë të madh, po i parashikojnë edhe një stagflacion të ekonomisë nëse nuk ndërmerren reforma strukturore. Do të thotë kjo është edhe më alarmante se ajo që ne për momentin e shohim”, tha Abil Baushi – profesor i Ekonomisë.
Sipas tij është shumë e rëndësishme që shteti të përgatitet që në të ardhmen të dijë t’i përballojë krizat, që të kemi qëndrueshmëri ekonomike gjatë tërë kohës. Ndërsa shton se masat e deritanishme janë masa afatshkurta që nuk guxon të përdoren në kohë të gjatë.
“Qeveritë tona marrin masa afatshkurta dhe në shumicën e rasteve i përdorin aq shumë ato masa sa që ato fillojnë të gjenerojnë probleme sikur marzha e tregut e gjëra të tjera që janë masa afatshkurta dhe duhet t’i përdorësh për një periudhë kohore të shkurtë”, pohoi Abil Baushi – profesor i Ekonomisë.
Sipas parashikimeve dhe analizave të ekonomistëve vendi ynë edhe gjatë vitit 2023 do të ndjejë krizën ekonomike ndërsa do të fillojë të stabilizohet në vitin 2024.