2021, viti i shpresës, por edhe pasigurisë! Pas nesh lëmë vitin më të vështirë në plan ekonomik

Një vit dramatik dhe i vështirë në plan ekonomik. Shumë vende pune të humbura, shumë kompani të mbyllura dhe biznese të shuara. Tregje “të gjymtuara” dhe qytetarë të varfër. Pasojat e pandemisë lanë plagë të thella, por askush nuk e di cilat janë sfidat në vitin që vijon. A na pret rikuperim ose mbijetesë në varfëri? Njohësit e çështjes me mendime të ndara, mes pesimizmit dhe optimizmit. Sipas German Filkovit nga Qendra për Komunikime Civile, viti 2020 ka qenë viti i krizës i cili pati dhe do të ketë pasoja të paparashikueshme në tre vitet e ardhshme.

“Imagjinoni që në një tremujor në fillim të krizës vlera e PBV-së u reduktua për 15%, që është një rënie e paparë. Nuk kemi pasur një rënie të tillë që nga viti 2001. Niveli i papunësisë është rritur, borxhi i vendit është rritur, duhej të merreshin kredi për t’i mbuluar të gjitha ato ndihmat ndaj kompanive”, pohoi German Filkov, nga Qendra për Komunikime Civile.

Sipas Filkovit, notë pozitive kanë shënuar vetëm bujqësia, ndërtimtaria dhe IT-sektori. Të gjithë resorët e tjerë, siç shpjegon, do të ballafaqohen me pasiguri të madhe. Është decid se për ta viti i ri përfundon vetëm në kalendar, kurse problemet dhe pasiguria vazhdojnë. Filkovi thotë se për Maqedoninë më me rëndësi është rikthimi i stabilitetit fiskal.

“Buxheti duhet të mbushet nga burimet e brendshme, nga ekonomia e brendshme dhe jo nga kreditë e huaja. Për këtë, do të jetë e nevojshme të përmirësohet disiplina financiare, por edhe të reduktohet ekonomia gri”, tha German Filkov, nga Qendra për Komunikime Civile.

Ministri i Financave në fillim të mandatit të tij, pranoi se situata ekonomike është shumë serioze.

“Nuk do të jetë e lehtë. Në gjysmën e parë të vitit ekonomia ka rënie prej 6.4%… Borxhi shtetëror në fund të tremujorit të dytë arriti 50.7%, kurse borxhi i përgjithshëm publik –  59.5%”, pohoi Fatmir Besimi, ministër i Financave.

Korona-kriza i zbuloi të gjitha situatat në vend, deklaroi kryetarja e Lidhjes së Odave Ekonomike të Maqedonisë, Daniella Arsovska.

“Mund të them se Covid-i zbuloi  se edhe në një situatë kaq të vështirë aktorët politikë në vend nuk gjetën gjuhë të përbashkët për t’u ulur dhe për të ndihmuar secili në mënyrën e vet, por vetëm maksimizuan polarizimin që kemi në shoqëri dhe të gjithë u përpoqën të fitojnë sa më shumë pika politike”, tha Daniella Arsovska, kryetare e LOE.

Viti i ardhshëm nuk do të jetë vit i prosperitetit, thonë analistët ekonomikë. Ata shtojnë se rimëkëmbjen mund ta presim nga gjysma e dytë e vitit 2021.

“Pas nesh lëmë një vit i cili na solli një krizë të përmasave të papara. Pandemia me Covid e solli krizën më të rëndë në historinë e pavarësisë sonë dhe goditi të gjithë sektorët. Duket se më së shumti pësoi ekonomia. Të shpresojmë se në Vitin e Ri -2021, më të fund ta mposhtim të keqen e re dhe do të jetojmë në një vit pa maska”, Vesna Jakimovska, gazetare.