2 vjet nga tragjedia e Modularit të djegur në Tetovë / Familjarët protestuan duke kërkuar zbardhjen e plotë të rastit

“32 vjet, shtet 32 vjet korrupsion që vret”, me këtë parullë sot familjarët e viktimave të spitalit modular në Tetovë bashkë me qytetarët marshuan nga vendi ku ka qenë spitali modular deri te gjykata e Tetovës. Familjarët kërkuan dorëheqjen e kryeprokurorit edhe të gjithë prokurorëve që kanë marrë pjesë në hetimin e këtij rasti.

“Si familjarë, kërkojmë urgjentisht hapje të procedurës gjyqësore për zjarrin. Rigjykim dhe rishikim i vendimeve nga gjykimi paraprak në gjyqin e Tetovës. Shkarkimi i prokurorit republikan Joveski, bashkë me kryeprokurorin e Tetovës Besir Aliu, prokurorët Zorica Pavllovic, Dejan Petreski, Hanefi Ameti dhe të tjerë të involvuar në krim. Pa drejtësi nuk ka qetësi”.

Protesta përfundoi përpara gjykatës themelore të Tetovës, ku edhe vendosën parullat me porositë për drejtësi në shtet.

“Gjithë prokuroria këtu e ka bë hilen më të madhe, duke injoruar këtë ekspertizë gjermane dhe duke marr parasysh ekspertizën e fakultetit të Shkupit ku koleg janë një i dyshuar për veprën kriminale dhe një tjetër që falsifikon deklaratën”.

“Mbrojtja e interesave të klaneve dhe oligarkëve të ndryshëm, njerëzit i ka revoltu tejmase dhe besoj që kjo protestë nuk do ndalet këtu. Gjithë njerëzit janë të revoltuar dhe kërkojnë drejtësi, kërkojnë të jetojnë në një shtet normal që ka siguri për të gjithë. Për momentin në këtë shtet nuk kemi siguri”.

Familjarët paralajmëruan edhe protesta të tjera, madje dhe para prokurorisë themelore në Shkup. Me tetë shtator të para dy viteve, nga shpërthimi i zjarrit në spitalin modular në Tetovë, jetën e humbën 12 pacientë dhe dy familjarë, pas çka, përveç prokurorisë dhe inspektoratit të vendit, hetim kreu edhe ekipi hetuesve gjermanë, por, sipas publikimeve të fundit të një dokumentari, rezultoi se, të dhënat e nxjerra nga këto hetime, nuk janë marrë parasyshë, dhe gjykimi pas një zvarritjeje të gjatë, përfundoi me asnjë ditë burg për asnjë të akuzuar.