Një mjek nga Kalifornia, i cili i furnizoi ketaminë yllit të serialit “Friends”, Matthew Perry është dënuar me 30 muaj burg federal, duke u bërë personi i parë që merr një dënim për vdekjen e aktorit nga mbidoza.
Dr. Salvador Plasencia ishte një nga pesë të akuzuarit në një hetim federal që shqyrtoi se si Perry e siguroi anestezionin disociues përmes një rrjeti droge në Hollywood.
Perry, 54 vjeç, u gjet i vdekur në shtëpinë e tij në Los Angeles në vitin 2023, pas vitesh luftimesh me depresionin dhe varësinë.
Familja e aktorit i kërkoi gjykatësit një dënim të gjatë, duke e quajtur Plasencia-n “më fajtorin” dhe duke detajuar vështirësitë e tyre për të kuptuar pse ai e furnizonte vazhdimisht Perry-n me drogë.
Nëna e Perry-t, Suzanne Morrison, ishte midis disa anëtarëve të familjes që folën në gjykatë përpara dënimit të Plasencia-s. Ajo nxori në pah mesazhet me tekst të përfshira në të dhënat e gjykatës, ku Plasencia e kishte quajtur Perry-n një “idiot” dhe pyeste veten se sa do të ishte i gatshëm të paguante për drogën.
Ajo ishte emocionale, duke iu drejtuar drejtpërdrejt Plasencias. “Nuk kishte asgjë idiote tek ai burrë”, tha nëna e tij, duke shtuar se mjeku kishte bërë një betim për të mbrojtur njerëzit dhe se duhej ta kishte mbrojtur djalin e saj.
Plasencia foli gjithashtu në gjykatë dhe iu drejtua familjes së Perry-t, duke shprehur keqardhje, ndërsa nëna e tij qante në një vend pas tij. Plasencia tha se ka një djalë dy vjeç.
“Dua ta rris siç duhet”, tha ai. “Gjithashtu mendoj se si t’ia shpjegoj këtë”.
Ai gjithashtu i kërkoi falje familjes së Perry-t.
“E zhgënjeva veten. Nuk ka justifikim. Nuk mund ta zhbëj atë që është bërë. E di këtë. Duhet ta kisha mbrojtur, siç tha nëna e tij. Më vjen shumë keq”.