“100 ditë rrena dhe humbje”! Opozita shqiptare dhe maqedonase me kritika për qeverinë e re

100 ditët e para të kësaj qeveria janë, 100 ditë nga 4 vitet e qeverisjes më të keqe që ka pasur ndonjëherë shteti, vlerëson kreu i opozitares VMRO-DPMNE, Hristijan Mickoski.

Rikujton se LSDM premtoi jetë, edhe më shumë, edhe më mirë, por për 100 ditë fituam veto në rrugën drejt Bashkimit Evropian, tregti me identitetin, 1400 jetë të humbura nga koronavirusi, rrymë më të shtrenjtë, varfëri dhe recesion ekonomik.

“Përderisa kjo qeveri funksionon, do të vazhdohet shitja e Maqedonisë dhe çdo ditë me këtë Qeveri, të drejtuar nga Zoran Zaev, do të jetë më e vështirë për çdo qeveri të ardhshme që të ofrojë zgjidhje për të gjithë atë të keqe që do ta sjellin, politikat e gabuara. Dëmi është i madh”, tha Mickovski.

Opozita shqiptare po ashtu me kritika për 100 ditët e para të qeverisë “Zaev 2”.

“Qeveri e rrenave”, “Kryeministri shqiptar rrenë”, “Qeveri e marihuanës”, “Vetingu rrenë”, “Ligji për kazinotë rrenë” ishin vetëm disa nga çështjet që kreu i Aleancës për Shqiptarët dhe ai i Alternativës ia rikujtuan qeverisë, sidomos BDI-së. Kreu Ziadin Sela thotë se inegristët nuk kanë realizuar asnjë premtim që ua dhanë shqiptarëve, ndërsa s’kanë ofruar asgjë përveç gënjeshtrave.

“Kjo qeveri nuk ka pikën e moralit tanimë që të vazhdojë e të qeverisë. Kjo qeveri do të duhet të japë dorëheqje. Kryeministri Zaev duhet të japë dorëheqje dhe patjetër duhet të shkohet në qeveri të zgjeruar, që obligimet të merren nga të gjithë aktorët politikë për çdo lloj kompromisi që duhet bërë”, tha Sela.  

Dy karakteristikat e qeverisë së re janë përjashtimi i zërit të të tjerëve si dhe dështimi thotë kreu i Alternativës Afrim Gashi, duke përmendur ekonominë, eurointegrimet, procesi arsimor dhe keq menaxhimin me pandeminë.

“Është e tmerrshme që të jeni i pari në rajon me vdekshmërinë më të lartë, nuk po flasim për Evropë, por ne jemi prapa Kosovës, Shqipërisë, Malit të Zi, Serbisë, Greqisë, Bullgarisë e gjitha vendeve dhe kjo është alarmante. Numri i të infektuarve është shumë i lartë. Dështimi më i madh i kësaj Qeverie në raport me pandeminë është mos përgatitja për valën e dytë”, tha Gashi.

Sa i përket shanseve për interpelancë ndaj ndonjë ministri të qeverisë, Sela këtë proces e quajti lojë vetëm për goditje politike. Sa i përket mocionit të mosbesimit të Qeverisë, kreu i Aleancës për Shqiptarët tha se do ta përkrahnin një të tillë, por më mirë sipas tij do të ishte dorëheqja e Kryeministrit dhe ardhja e një qeverie të zgjeruar.