Jemi në fshatin Vorcë, diku 35 km nga qendra e Shkupit. Këtu jemi në shkollën fillore Faik Konica. Nga nesër nxënësit e kësaj shkolle do të fillojnë mësimin me prani fizike, meqenëse është një numër i vogël i nxënësve.
Kjo shkollë fillore ka vetëm një klasë.
Nuk ka ngrohje qendrore, ndërsa edhe ulëset janë të modelit të vjetër.
E mirëmbajta bëhet me vetiniciativë të banorëve.
Ndonëse kushtet e objektit lënë shumë për të dëshiruar, megjithatë nga nesër 6 nxënësit e vetëm të fshatit do të vijnë dhe do të mbajnë mësimin me prani fizike.
Arsimtari i vetëm i shkollës Nexhat Osmani, thotë se janë marr të gjitha masat për pritjen e nxënësve në shkollë.
Nexhat Osmani: “Dezinfektues kemi vendosur, mjete për matjen e temperaturës edhe ato i kemi, kemi bërë që të ketë edhe dezinfektues, shenjat se nga duhet të lëvizin nxënësit i kemi rregulluar hyrje dhe dalje”.
TV21: Sa nxënës janë?
Nexhat Osmani: “Në shkollën tonë janë vetëm 6 nxënës, me pesë paralele të kombinuara. Këtë vit klasë të parë nuk kemi prej klasën e dytë deri në të pestën”.
Tek shkolla ishin nënvizuar se ku do të duhet të lëvizin nxënësit, si dhe ishin vendosur edhe dezinfektuesit. Nga ministria e Arsimit theksuan se nesër me prani fizike do të mbajnë mësim 600 shkolla në tërë territorin e vendit.