1.5 milion denarë për nënstacionet e autobusëve! Transporti askund, Arifi: Autobusët do të vijnë për vitin e ri

Edhe pse Tetova akoma nuk ka transport publik në qytet tash më ka filluar vendosja e nënstacioneve të autobusëve. Edhe për këtë Komuna e Tetovës me 20 korrik ka nënshkruar kontratë me kompaninë Amazon për vendosjen e nënstacioneve të autobusëve me verë prej 1 milion e 500 mijë denarë pa TVSH. Kryetarja e Komunës së Tetovës Teuta Arifi për TV21 tha se kjo është bërë me qëllim që nënstacionet të jenë të gatshëm kur të vijnë autobusët.

 “Në qoftë se i përfundojmë autobusët e nuk e përfundojmë këtë procesin tjetër, ajo do të në vendoste në problem funksionalitetin. Tendenca jonë është që në mënyrë paradreke të kryejmë furnizimin  e autobusëve  përfundimin e nënstacioneve dhe vënien në funksion të ndërmarrjes”, theksoi Teuta Arifi – Kryetare e Komunës së Tetovës.

Por kur do të sillen autobusët që është janë premtuar qe shtatë vite me radhë?

 “Kemi pasur procedurë e cila është ripërsëritur pas vlerësimeve të komisionit dhe këshilltarëve të Bankës Botërore, ne vlerësojmë se kjo procedurë  deri për vit të ri para vitit të ri, të përfundojmë por e them vitin e ri si një kufi ku përfundimisht do përfundojë edhe procesi i furnizimit, në ndërkohë është duke u vendosur në funksion edhe ndërmarrja e cila do të duhet të menaxhojë me funksionimin e këtyre autobusëve”, u shpreh Teuta Arifi – Kryetare e Komunës së Tetovës.

Arifi një gjë të tillë e ka premtuar edhe në gjashtë mujorin e parë të  mandatit të dytë pikërisht në Clik PLUS në vitin 2018  duke premtuar se transporti publik do të jetë gati deri në fund të mandatit të saj duke themeluar një ndërmarrje e cila do të jetë funksionale.

A besoni se gjatë këtij mandati do të këtë transport publik në Tetovë

Arifi: “Besoj se po”.

 A mund ta premtoni publikisht ?

Arifi:” Unë e kam thënë se do e bëjmë këtë mandat dhe do e bëjmë”.

Por Arifi që nga shkurti i këtij viti tha se mjetet janë siguruar nga Banka Botërore.

Një premtim e bëri edhe në shkurt të vitit 2020.

“Vlera e autobusëve është afër 900 mijë euro dhe si rezultat i suksesit të këtyre dy projektimeve Banka Botërore na ofron edhe grant në vlerën e 27% të realizimit të këtyre projekteve”, potencoi Teuta Arifi – Kryetare e Komunës së Tetovës.

Një premtim të njëjtë Atifi ka bërë edhe gjatë mandatit të parë  në vitin2013  duke thënë se Tetova do të jetë një qytet me linja te rregullta të transportit publik.