Naser Zyberi i ulur përball kryetarit të Kuvendit Talat Xhaferi solemnisht u betua si Avokat i Popullit.
“Deklaroj se funksionin si Avokat i popullit do ta ushtrojë me vetëdije dhe përgjegjësi dhe do t’i respektojë ligjet e Republikës së Maqedonisë së Veriut”.
Menjëherë pas betimit, Zyberi u pyet nga gazetarët nëse detyra e re që ka marrë është kompensim për postin kryeministër.
“Zgjidhja ime për Avokat të popullit nuk është asnjë kompensim për të kaluarën time.
Përkundrazi angazhimet e mia në të gjitha fushat e më hershme janë garancion i plot se do të jem në funksion të ushtrimit ligjor dhe kushtetues të detyrës Avokat i popullit, një funksion jashtëzakonisht i rëndësishëm për qytetarët e vendit”, tha Naser Zyberi – Avokat i Popullit.
Avokat i Qeverisë – BDI-së, kështu sot me një transparent para zyrave të Avokati të popullit dolën të rinjtë e ASH-Alternativa.
“Fatkeqësisht në mënyrë shumë dinake në Kuvendin e Republikës së Maqedonisë së Veriut vetëm me 61 vota të pozitës dhe pa pajtimin e opozitës Naser Zyberi u zgjodh Avokat i popullit. Rikujtojmë që Naser Ziberi përveç që ka qenë funksionar politik dhe partiak në zgjedhjet e fundit ishte edhe kandidat për Kryeministër shteti nga Bashkimi Demokratik për Integrim”, u shpreh Liridona Emini nga ASH-AAA.
Opozita shqiptare e kryesuar nga Koalicioni Aleanca për Shqiptarët dhe Alternativa do të dorëzojnë iniciativë në Gjykatën Kushtetuese për vlerësimin e kushtetutshmërisë së zgjedhjes së Naser Zyberit për Avokat të Popullit.
Ndryshe edhe pse Naser Zyberi ishte pjesë e fushatës parazgjedhore të BDI-së, thotë se nuk është kuadër politik për postin që është zgjedhë.