I madh është numri i qytetarëve të cilët këtë vit nuk e kurorëzuan dashurinë e tyre me martesë për shkak të pandemisë së koronavirusit që zgjat më shumë se dhjetë muaj. Me ndalesën e tubimeve masive dhe ahengjeve erdhi deri te anulimi i dasmave dhe fejesave të caktuara praprakisht, ndërsa i vogël është numri i atyre të cilët vendosën të lidhin martesë vetëm para ofiçarit.
Këtë vit, siç thonë nga Drejtoria për udhëheqje të librave amë, numri i martesave të lidhura është 7000, që është rreth 4500 më pak nga viti i kaluar.
Për lidhje të martesës gjatë pandemisë u vendosën edhe protokolle. Prania e mysafirëve ishte reduktuar në minimum me respektim të masave për mbrojtje, si mbajtja e distancës, mbajtja e maskave dhe dezinfektimi.
“Në regjistrim mund të marrin pjesë ofiçari, partnerët dhe dy dëshmitarët e tyre. Të pranishmit duhet të mbajnë maska dhe doreza dhe të mbahet distancë prej dy metra me ofiçarin. E njejta vlen edhe për në salla dhe terren në vend të hapur, ndërsa kur janë në vend të hapur munden edhe pesë-gjashtë persona në distancë me maska. Ceremonia është shkurtuar në 10 minuta”, potencojnë nga Drejtoria.
Dhe përderisa numri i martesave të lidhura është zvogëluar, në tremujorin e tretë të këtij viti është regjistruar rritje e numrit të divorceve.
“Në periudhën prej tre muajve janë marrë 357 raporte për çifte të divorcuara që paraqet rritje prej 8,5 për qind në krahasim me periudhën e njëjtë të vitit të kaluar, tregojnë të dhënat e Entit Shtetëror për Statistikë. Më së shumti procedura për divorce janë regjistruar në Shkup, Tetovë dhe Kumanovë.