Zgjedhjet në RMV të veçanta për shumëçka, protokoll kundër Kovid-19, por pa rezultate ditën e zgjedhjeve

Përfundoi procesi zgjedhor i cili që zgjati tre ditë, por siç ndodh zakonisht, rezultatet preliminare nuk u publikuan ditën kur u mbyllën kutitë e votimit. Në vend të rezultateve preliminare, pas mbylljes së kutive u njoftua se uebfaqja e KSHZ-së është sulmuar nga hakerët.

“Nga ajo që jam informuar, mund të them se bëhet fjalë me shumë gjasë për përpjekje për sulm të jashtëm. Unë nuk jam ekspert i IT-së që të mund të ju them diçka”, tha Oliver Derkoski, kryetar i KSHZ-së.

KSHZ- doli para mediave edhe në orët e para të 16 korrikut, por në të u publikuan vetëm të dhënat nga përpunimi i 3402 nga gjithsej 3480 venvotime. Pas kësaj uebfaqja disa herë është rikthyer, por asnjëherë me numra të njëjtë. Këto të dhëna as i konfirmonin e as demantonin nga KSHZ-ja duke thënë se po kontrollohen procesverbalet.

E tërë kjo situatë u bë edhe shënjestër e kritikave nga partitë politike. Lideri i VMRO-DPMNE-së, Hristijan Mickoski tha se bllokimi i uebfaqes ka për qëllim të manipulojë rezultatet e zgjedhjeve.

“Sot uebfaqja e KSHZ-së nuk punon, kurse fitojmë informacione të ndryshme dhe se dyshuese forma se si përpunohen dhe futen të dhënat”, theksoi kryetari i VMRO-DPMNE-së, Hristijan Mickoski.

Reagoi edhe kryeministri teknik në largim, Oliver Spasovski. Procesin zgjedhor e quajti si korrekt dhe demokratik dhe falënderoi Komisionin për sëmundje ngjitëse dhe qytetarët për respektimin e protokollit për mbrojtje nga virusi Kovid-19. Por tha se pret që në këtë proces të kontribuojë edhe KSHZ.

“Nga Komisioni Shtetëror Zgjedhor pres që të japin kontribut në atë proces. Qytetarët i presin rezultatet zyrtare nga zgjedhjet”, deklaroi Oliver Spasovski.

Procesin zgjedhor e kanë komentuar edhe vëzhguesit ndërkombëtar si OSBE-ODIHR. Ata thanë se kanë vëzhguar tërë procesin, por në raportin final për të do të fusin edhe fazën e përpunimit dhe publikimit të rezultateve.

“Vlerësimi përfundimtar në raportin përfundimtar gjithashtu do të përqëndrohet edhe në fazan e ardhshme, përfshirë këtu edhe numërimin e votave dhe publikimin e rezultateteve dhe për parashtresat për dhe pas ditës së zgjedhjeve dhe në të do të japim edhe rekomandimet tona”, tha Laima Andrikien, kryetare e misionit.

Përndryshe, në proceset zgjedhore paraprake rezultatet preliminare të zgjedhjeve janë publikuar zakonisht pas 4 orësh që janë mbyllur vendvotimet. Megjithatë, këto zgjedhje përveç se u karakterizuan me vonesën e rezultateve, zgjatën tre ditë dhe kutitë e votimit u mbyllën jo në ora 19 siç ndodh rëndom, por në ora 21. Gjithashtu u mbajtën në një protokoll të veçantë për shkak të epidemisë së Kovid-19.