Zgjatja e orarit të punës në çerdhe! Reagon Sindikata, përgjigjet Shahpaska

Vendimi i drejtorëve të çerdheve për ta zgjatur orarin e punës nga 6 deri në 8 orë, ka ngjallur pakënaqësi tek edukatoret. Për këtë reagoi edhe sindikata e Pavarur e Arsimit, Shkencës dhe Kulturës nga ku thonë se kjo është shkelje e njëanshme të marrëveshjes kolektive për mbrojtjen e fëmijëve dhe Ligjin për Mbrojtjen e Fëmijëve.

 “Ne kërkojmë nga drejtorët e institucioneve që të ndryshojnë vendimet që ata u kanë dhënë punonjësve në mënyrë që të kthehet orari i vjetër i punës prej gjashtë dhe shtatë orësh për këto të punësuar. Ne kërkojmë nga Inspektorati i punës të hyjë në kopshte për të parë nëse ato kanë kushte të sigurta pune si dhe  të konstatojë nëse ka deklaratë të nënshkruar nga drejtorët për siguri dhe shëndet në punë”, deklaroi Jakim Nedellkov – SASHK.

E pyetur se a ka shkresë nga Ministria për ndryshim të orarit të punës me udhëzime për rritjen e orëve të punës për të punësuarit nëpër çerdhe, Ministrja Jagoda Shahpaska u përgjigj:

 “Si ministre për punë dhe politikë sociale me përgjegjësi pohoj se nuk bëhet fjalë për asnjë shkelje të të drejtave të punëtorëve në vend, duke përfshirë edhe të punësuarit nëpër çerdhe. Punohet në përputhje me marrëveshjen kolektive dhe ligjin. Qëllimi ynë themelor është të kujdesemi për qëndrim të sigurt të fëmijëve nëpër çerdhe në këtë periudhë kur e gjithë bota po përballet me pandeminë e Kovid-19”, u shpreh Jagoda Shahpaska – Ministre për Punë dhe Politikë Sociale.

Ajo theksoi se drejtorët e çerdheve e organizojnë orarin e punës së të punësuarve të tyre, dhe e gjithë kjo është në përputhje me ligjin dhe marrëveshjen kolektive.