Vjen koha e rendit, drejtësisë dhe disiplinës, koha e respektimit të gjyqësisë dhe sundimit të së drejtës, premtoi mandatari Zoran Zaev para deputetëve duke e prezantuar programin e Qeverisë. Ai paralajmëroi një miliard euro investime të huaja dhe ulje të shkallës së papunësisë pas krizës nga 3% në nivel vjetor, me një qëllim – shkallë njëshifrore e papunësisë deri në fund të mandatit. Zaev paralajmëroi kornizë ambicioze kohore për hapje dhe mbyllje të kapitujve për negociatat me BE dhe i thirri kompanitë e vendit të marrin pjesë në tregun e tenderëve të NATO-s i cili vlen 4 miliardë.
“Me zgjedhjen e kësaj qeverie e kompletojmë sistemin në institucione efikase dhe të fuqishme, me kapacitet dhe legjitimitet të plotë”, deklaroi Zaev.
Kishte edhe duartrokitje por edhe brohoritje.
Seanca filloi me reagim të ashpër nga deputeti i VMRO-DPMNE-së, Igor Janushev. Ai reagoi se 8 deputetë kanë mandate të pa verifikuara, ata që hynë në vendin e deputetëve që bëhen ministra.
“Më duhet të sugjeroj se për momentin në këtë sallë kemi 8 deputetë që nuk kanë legjitimitet, mandati i të cilëve është verifikuar në mënyrë ilegale”, tha Janushev.
Kryetari Talat Xhaferi e thirri Janushevin që ta lexojë Rregulloren duke i thënë se partitë janë të përgjegjëse pse dy muaj nuk i kanë thirrur grupet e punëve. Replikat vazhduan edhe me deputeten Siljanovska Dafkova e cila e qortoi Xhaferin për shkak se ka ardhur me vonesë ndërsa ai i ktheu se nuk është “thes për të goditur”.
“Ju lus tjetër herë që të vini në kohë. Nuk ka ndodhur që të mos vonoheni një orë. Ju lus për respekt ndaj deputetëve. Në të drejtën parlamentare thuhet se I pari vjen kryeparlamentari që të na mbledh rreth tij”, deklaroi Siljanovska Dafkova.
Ia ktheu Xhaferi. “Sa i takon vonesës sime, e nderuara deputete. Kryetari Kuvendit ka ardhur 15 minuta në 9 dhe nëse planifikoni se është ditë jopune, ashtu siç mendoni, atëherë edhe për kryetarin është ditë jopune”.
Pjesa dërmuese e debatit u zhvillua mes deputetëve të LSDM-së dhe VMRO-DPMNE-së dhe për këtë reagoi Aleanca për Shqiptarët.
“Kështu po del se 5 orë po humbim për diskutim të një deputeti që sipas meje nuk është në rregull. Nëse ka replika le të ketë nga dy a tre, kjo kështu nuk ka fund”, deklaroi Snopçe.
Opozita me kritika, paralajmëroi rrëzim të qeverisë përmes proteste masive.