Kaluan 8 ditë pas fillimit të fushatës së BDI-së për kryeministër shqiptar, por ende nuk e publikojnë emrin e kandidatit të tyre. Në rrjetet sociale tashmë disa ditë qarkullon emri i biznesmenit Lazim Destani si kandidat për kryeministër të ardhshëm. Ai deri më tani nuk është prononcuar publikisht nëse pranon të jetë kandidat i BDI-sl për këtë funksion. Edhe pse lideri i LSDM-së në Click Plus tha se Destani ka demantuar publikisht, një gjë e tillë ende nuk ka ndodhur.
“Së pari, BDI-ja nuk e tregon emrin e kandidatit për kryeministër të shtetit dhe nuk do ta tregojë deri në fund të fushatës,” tha Zoran Zaev, Kryetar i LSDM-së.
Gazetari: Në opinionin publik spekulohet se Lazim Destani është kandidati për kryeministër.
Zaev: Njeriu demantoi, publikisht.
Nëse bëhet fjalë për taktikë të BDI-së ose me të vërtetë kanë kandidat për të cilin Bujar Osmani tha se do ta publikojnë kur të vijë koha për një gjë të tillë.
“Çështja e emrave ka qenë pjesë e një strategjie afatgjate. Do e komunikojmë në momentin kur do vjen dita për atë,” tha Bujar Osmani, BDI.
TV21 iu drejtua shërbimeve të Lazim Destanit, por prej atje na thanë se duhet të kërkojmë qëndrim në formë të shkruar. Ashtu edhe bëmë. Megjithatë, përgjigje nuk morëm.
Përndryshe, Lazim Destani është afarist nga Tetova i cili në sferën e biznesit është i njohur për nga kompania Ekolog, por edhe si aktivist dhe humanist i cili asnjëherë më parë nuk ka qenë i përfshirë në politikë. Ideja për kryeministër shqiptar nxiti debate të brendshme politike dhe mospajtime me partitë opozitare shqiptare. Sipas tyre kjo ideja e BDI-së është e papranueshme, gjë me të cilën pajtohen edhe partitë maqedonase.