Partnerët e koalicionit qeverisës, do ta mbështesin njëri-tjetrin në rrethin e dytë të zgjedhjeve lokale, shprehet kreu i LSDM-së, Zoran Zaev.
“Do të kemi komuna ku LSDM, BDI, Besa, PDSh, partitë më të vogla, partitë turke, PLD apo të ngjashme, do të kenë kandidatët e tyre dhe kjo do me thënë se në rrethin e parë nuk keni koalicion. Në raundin e dytë, kur qytetarët do të vendosin se kujt do t’i japin shansin që të hyjë në rrethin e dytë, atëherë është e logjikshme që partnerët e koalicionit në nivel qendror të mbështeten mes vete. Andaj është logjike që 2 kandidatë futen në rrethin e dytë dhe gjithsesi se do të japim mbështetjen njëri-tjetrit”, tha Zaev.
Kjo nënkupton se në rrethin e dytë të zgjedhjeve lokale, partitë shqiptare rivale, por që janë në qeveri, do të duhet të mbështesin njëra-tjetrën në komuna të caktuara. Për të qenë më e qartë, për shembull në Tetovë, nëse kandidati i BDI-së kalon në rrethin e dytë përballë një kandidati të opozitës shqiptare, Besa do të duhej të dalë me mbështetje ndaj kandidatit të BDI-së, ose anasjelltas, BDI të mbështesë kandidatin e Besës, që me shumë gjasa do të jetë Bilall Kasami.
I pyetur se a është BDI e gatshme të mbështesë Besën nëse kandidati i kësaj, në ndonjë komunë kalon në rrethin e dytë, zëdhënësi i integrisëve Bujar Osmani, thotë se po, ndonëse nuk beson se do të ketë nevojë.
“Parimisht po, edhe pse mendojmë që nuk do ketë situatë të tillë meqë gjitha parashikimet dhe anketimet thonë se në të gjitha komunat ku do të garojmë kandidatët e BDI-së, o do fitojnë në raundin e pare, o do hyjnë në raundin e dytë me epërsi”, tha Osmani.
E sekretari gjeneral i Besës, Arjanit Hoxha, thotë se në këtë fazë nuk mund të flasë se çfarë do të ndodhte në rrethin e dytë, por e pohon se edhe pse të vetëm në rrethin e parë, pretendojnë fitoren në shumë komuna, ndërsa Tetova mbetet prioritet i Besës.
“Nuk dua të flas dhe të përziej pushtetin lokal me pushtetin qendror, pasi që thellësisht besojmë si parti politike serioze, se koalicionit i determinon populli dhe vota e popullatës do të determinojë se kush do të jetë fituesi, dhe asnjëherë sovrani nuk bën gabim”.
TV21: Paralajmëroni se do ta mbështesni BDI-në në rast se kandidati i tyre shkon në rrethin e dytë?
“Unë e thash dhe e ripërsëris se hyjmë në garë për të fituar dhe seriozisht qasemi kësaj fushate për të dallimin ashtu siç e kemi bërë dhe mendoj se e kemi bërë dallimin në qeverisjen në nivel qendror”.
Ditë më parë kreu i LSDM-së Zoran Zaev dhe ai i BDI-së Ali Ahmeti lidhën koalicion parazgjedhor për dalje të përbashkët në zgjedhje lokale që pritet të mbahen në mes të tetorit. Mbeten të hapur që pjesë e koalicionit të bëhen edhe partitë e tjera që aktualisht janë në Qeveri, por nga Besa pohojnë se nuk kanë koalicion parazgjedhor për zgjedhjet lokale.