Vuçiq: Kovaçevski reagoi ashpër ndaj Kurtit/Për opozitën këto janë politika anti evropiane dhe nënshtrim ndaj Serbisë

Kovaçevski reagoi shumë ashpër kundër Kurtit për atë që ai bëri në Tetovë. Këto ishin fjalët e presidentit serb Aleksandar Vuçiq nga Athina, e të cilat i transmetuan mediat serbe. Ai është shprehur i kënaqur që Kovaçevski paska kritikuar ashpër homologun e tij kosovar, Albin Kurti.

“E pashë kur Dimitar Kovaçevski fuqishëm i reagoi Albin Kurtit për atë që e bëri në Tetovë. Shumë fuqishëm, publikisht dhe hapur dhe dua që t’i lutë funksionerët tanë, madje edhe kur nuk kanë qëllim,të jenë të kujdesshëm që të mos u dle asgjë që do të mund të shfrytëzoheshin nga ana e disave, që të na bëjnë edhe neve të njejtë si Kurti”, tha Aleksandar Vuçiq – President i Serbisë.

Por me çfarë fjalësh e kritikoi ashpër kryeministri Kovaçevski homologun e tij Kurti? Tv21 dërgoi pyetje deri te press shërbimi i Qeverisë për atë se çfarë saktësisht ka thënë Kovaçevski për Kurtin, mirëpo deri në këto momente nuk kemi përgjigje.

E ndërkohë takimin mes Kovaçevski dhe Vuçiq dhe mesazhet paqësore se asnjëra prej shteteve nuk duhet të fyejë dhe rëndojë tjetrën, opozita shqiptare nuk e priti fare mirë. Izet Mexhiti nga Lëvizja Demokratike shprehet se Vuçiqi gjithmonë kur ka presion për t’i vendosur sanksione Rusisë, luan në kartën e botës serbe, duke e involvuar në këtë botë edhe Maqedoninë e Veriut.

 “Në momentin kur ka paralajmërime serioze nga ndërkombëtarët se Serbisë mund t’i vihen sanksione nëse nuk  vendos ajo sanksionet ndaj Rusisë, të takohesh dhe të thuash që gjithçka “shkëlqen” në raportet Serbi – Maqedoni e Veriut, kam frikë se kjo mund të reflektoj negativisht edhe në aspektin ndërkombëtar edhe vendor! Me këtë takim të Kovaçevskit dhe Vuçiqit, në vend që të jepen mesazhe paqësore, ata e bën të kundërtën! Kovaçevski e dëshmoi nënshtrimin  tij ndaj Serbisë, e tjetri e inkuadroi edhe Maqedoninë në  ‘botën serbe’.”, tha Izet Mexhiti, kryetar i LD-së.

Reagim kishte edhe nga Lëvizja Besa të cilët i bëjnë thirrje kryeministrit Kovaçevski të distancohet nga politikat pro serbe dhe anti evropiane.

Përndryshe sqarimet mes Kovaçevskit dhe Vuçiqit erdhën pas deklaratave të ministrit serb për mbrojtje, se Maqedonia e Veriut dhe Mali i Zi e kanë ofenduar Serbinë dhe përzihen në punët e saja të brendshme pasi kanë njohur si shtet të pavarur Republikën e Kosovës.