VMRO-DPMNE dhe LSDM duhet të koalicionojnë, thotë Todorov në Click Plus

VMRO-DPMNE dhe LSDM duhet të fillojnë procesin e pajtimit, por edhe në të ardhmen të bëjnë koalicion të përbashkët në zgjedhje – deklaroi në edicionin e mbrëmshëm të Klik Plus ish funksionari i lartë i VMRO-DPMNE dhe ish ministri në disa resorë, Nikolla Todorov. Ai vlerëson se dy partitë më të mëdha duhet të fillojnë këtë proces për shkak se për momentin shteti është shumë i ndarë, ndërsa njerëzit mes vete urrehen për shkak të pikëpamjeve të ndryshme politike.

“VMRO-DPMNE dhe LSDM duhet të fillojnë procesin e pajtimit. Ky shteti ynë tashmë është plotësisht i ndarë dhe i grindur. Ekzistojnë njerëz që mes vetes urrehen vetëm për shkak të pikëpamjeve të ndryshme politike”,-deklaroi Nikolla Todorov, ish ministër i Shëndetësisë.

Në lidhje me këtë çështje shkurtë u prononcuan nga VMRO-DPMNE-ja.

“Qëndrimi i partisë VMRO-DPMNE është shumë i qartë. VMRO-DPMNE nuk hyn në koalicion me mafian që është në pushtet. Nëse disa njerëzve kjo gjë u konvenon dhe u pëlqen, lirisht mund të vazhdojnë të rrinë në prehrin e Zoran Zaevit dhe të punojnë për të”,- pohoi Dimçe Arsovski, zëdhënës i VMRO-DPMNE-së.

Qëndrim zyrtar, edhe pse kërkuam, nga LSDM-ja nuk morëm. Burime partiake për TV21 thonë se diçka e tillë nuk është e mundshme derisa Mickoski është lider i VMRO-DPMNE-së.

Mbrëmë Todorov tha se VMRO-DPMNE-së i duhet tranzicion demokratik dhe se Mickoski duhet të tërhiqet nga pozicioni i liderit.

“Unë them publikisht se Mickoski duhet të largohet. Por nuk është poenta që Mickoski të largohet dhe të vijë dikush tjetër duke punuar në të njëjtën mënyrë. VMRO-DPMNE-së i nevojiten ndryshime serioze demokratike dhe nuk duhet të krahasohemi me LSDM-në”,- tha Nikolla Todorov, ish ministër i Shëndetësisë.

Todorov theksoi se nuk do të kandidohet për lider të partisë në kongres të kurdisur, duke shtuar se nuk është dëgjuar me ish liderin e partisë, Nikolla Gruevski, nga periudha kur mbahej kongresi në Vallandovë.