Vazhdon fushata zgjedhore presidenciale, ndërsa partitë politike nuk ndalen me kritika ndaj kundërshtarëve. Koalicioni VLEN përkujton hetimin nga Prokuroria Speciale me emrin “Pacienti”, e ku Osmani ishte i dyshuar për keqpërdorim të detyrës zyrtare.
“Jemi mbledhur këtu gra, nëna, motra, vajza për të zbardh këtë skandal, që pikërisht kandidati i sotshëm për President ka qenë i akuzuar për keqpërdorime financiare edhe në këtë objekt, i cili është i shenjtë për ne, e që për çdo ditë lindin bijat tona, motrat tona, shoqet tona”, theksoi Fitore Qirezi – VLEN.
Por për Bujar Osmanin këto akuza nuk pinë ujë. Siç thotë Osmani, rasti pacienti ka qenë thjeshtë një hetim që është mbyllur nga vet prokuroria, sepse është konstatuar se gjithçka ka qenë në rregull. Për VLEN-in thotë se vet ngritja e temave të vjetra tregon se nuk kanë ide se çfarë të ofrojnë.
“Ai rast është një hetim vetëm, që është ngritur nga një prokurore që tash është në burg dhe është në listën e zezë amerikane. Unë prej atëherë e kam ditur që ky hetim është ngritur për të diskredituar, me kërkesë ruse dhe me elemente korruptive dhe vet Prokuroria e ka mbyllur ende në fazë hetimore sepse ka konstatuar se gjithçka ka qenë në rregull”, tha Bujar Osmani – Fronti Europian.
Përndryshe rasti “Pacienti” u mbyll katër vite më pare pasi Prokuroria vlerësoi se nuk kishte asgjë të paligjshme në punën e Osmanit atë kohë si minister i shëndetësisë. Osmani fillimisht dyshohej për keqpërdorim të detyrë zyrtare gjatë prokurimeve publike, për punime ndërtimore në më shumë objekte të shëndetit publik. Hetimi atëkohë përfshinte gjithsej 15 persona.