“Kalojmë në veprim” është slogani i koalicionit VLEN për pjesëmarrje në Qeverinë e ardhshme bashkë me VMRO-DPMNE-në dhe Lëvizjen ZNAM. VLEN prezantoi platformën e punës si dhe eshalonin e parë. Programi bazohet në katër shtylla. Përshpejtimi i eurointegrimeve, lufta e pakompromis kundër krimit dhe korrupsionit, zhvillimi ekonomik dhe ngritja e standardit jetësor dhe pika e katërt zhvillimi i barabartë rajonal dhe fuqizimi i komunave përmes decentralizimit. Izet Mexhiti tregon se cilat pika nga programi i VLEN janë përfshirë në programin qeveritar.
“Ka pika të cilat janë të absolvuara nga programi jonë siç është fuqizimi i decentralizimit, shëndetësi më të mirë, investimet në arsim, fokus te diaspora, fokus tek zonat ekonomike dhe shumë çështje tjera”, tha Izet Mexhiti.
Por çfarë do të ndodhë me premtimet kryesore të VLEN siç janë shpërndarja prej 10 mijë eurove për çdo qytetarë, mbyllja e kazinove dhe kredive të shpejta, por edhe rritja e pagës minimale në 800 euro.
-Z.Mexhiti keni pasur edhe premtime që do të ndani nga 10 mijë euro për çdo qytetarë…
-Një ndër ato pika është edhe kjo.
-Mbyllja e kazinove, 800 euro pagë minimale, a janë përfshirë këto në programin qeveritar?
Po, ka në program edhe rritje të pensioneve edhe rritjen e rrogave. Sa i përket kazinove mendoj se do të kemi press konferencë të posaçme.
Premtime të tjera të koalicionit VLEN ishin heqja e termit 20% për gjuhën shqipe si dhe zgjedhja e presidentit në Kuvend, por duke pasur parasysh që këto mund të bëhen vetëm përmes ndryshimeve kushtetuese, Arben Taravari shpreson që të njëjtat të bëhen gjatë këtij mandati. Shton se kjo varet nga partnerët e tyre të koalicionit.
“Ndryshimet kushtetuese besoj se në këtë mandat do të ndodhin por dua t’u tregoj se kjo nuk varet prej shqiptarëve dhe vetëm prej VLEN-it por çdoherë edhe partnerët në Qeveri të përkatësisë maqedonase duhet të jenë dakord. Unë mendoj se tash i kemi numrat vetëm na duhet vullneti i mirë dhe një koordinim i mirë mes Shkupit dhe Sofjes. Vazhdojmë të qëndrojmë në tërheqjen e 20% nga Kushtetuta, dhe vazhdojmë të mendojmë se Maqedonia nuk duhet të jetë më pjesë e Ballkanit të Hapur”, dekalaroi Taravari.
Në këtë panel folën edhe ministrat që do të jenë nga radhët e koalicionit VLEN, duke prezantuar programet në ministritë përkatëse.
Ministër i Ekonomisë dhe Punës do të jetë Besar Durmishi, ministër i Politikës Sociale Fatmir Limani, ministër i ekologjisë njëherit zëvendëskryeministër i parë Izet Mexhiti, ministër i shëndetësisë Arben Taravari, ministër i eurointegrimeve Orhan Murtezani, ndërsa Arben Fetai zv.kryeministër për qeverisje të mirë.
Pas formimit të Qeverisë VLEN pritet që të zyrtarizohen edhe emrat e zëvendësministrave. Siç është mësuar deri tani, Safije Sadiki Shaini nga Alternativa do të jetë zv.ministre e Sportit. Nga po e njëjta parti Lulzim Aliu është zgjedhur të jetë zv.ministër i Arsimit. Nga radhët e Lëvizjes Demokratike, Kaltrina Zekolli-Shaqiri do të jetë zv.ministre e transportit ndërsa Muhamet Ameti zv.ministër i punëve të brendshme. Nga radhët e ASH-së, Flakron Bexheti do të jetë zv.ministër i bujqësisë ndërsa Elfete Ismaili zv.ministre e mbrojtjes. Lëvizjes Besa do t’i takojë vetëm funksioni zv.ministër i Kulturës, me të cilin do të drejtojë Sedat Sulejmani.
Seanca kuvendore për të debatuar dhe votuar përbërjen e re qeveritare është caktuar për nesër në ora 11, ndërsa afati i fundit i votimit është mesnata e ditës së diel.