VLEN dhe BDI përplasen për Alta Bankën, kush mban përgjegjësi?

TË FUNDIT

VLEN ngre dyshime për një skemë milionëshe mes krushkut të Ali Ahmetit dhe oligarkut serb Davor Macura, lidhur me blerjen dhe shitjen e aksioneve të Alta Bankës në Maqedoni. Sipas VLEN-it, kompania “AS Senjak” fillimisht mori kredi prej 5 milionë eurosh nga Alta Banka në Beograd, ndërsa tre muaj më vonë ia shiti aksionet Macurës. VLEN kërkon hetim urgjent nga Prokuroria Publike dhe Drejtoria e Inteligjencës Financiare për të verifikuar lidhjen mes kredisë prej 5 milionë eurosh të 9 qershorit dhe shitjes së aksioneve më 17 shtator 2025, duke kërkuar përgjegjësi financiare dhe penale.

BDI i kundërpërgjigjet VLEN-it për rastin e Alta Bankës, duke akuzuar Qeverinë e Mickoskit dhe VLEN-in se po përpiqen të mjegullojnë të vërtetën. BDI thekson se vendimi i vitit 2023 për mbrojtjen e aksioneve shtetërore në Serbi nuk kishte lidhje me hyrjen e Alta Bankës në Maqedoni. Sipas saj, procesi i marrjes së Stopanska Bankës në Manastir nga Alta Banka u zhvillua në vitin 2025, gjatë qeverisjes aktuale, me pëlqimin e Bankës Popullore, lejen e Komisionit të Letrave me Vlerë të drejtuar nga kuadër i VLEN-it dhe vendimet e Qeverisë së Mickoskit.

BDI kërkon të bëhet e ditur se çfarë kontrollesh janë kryer, pse Qeveria i përfshiu institucionet publike në trajtimin e ofertës dhe çfarë përgjegjësie mbajnë institucionet përkatëse, përfshirë Komisionin e drejtuar nga Bujare Abazi.